Հայ Կաթողիկէ Պատրիարքության մահազդը

Տանն Կիլիկիոյ Կաթողիկէ Հայոց Ամենապատիւ և Գերերջանիկ Տէր Գրիգոր Պետրոս Ի. Կաթողիկոս Պատրիարքը, Հայ Կաթողիկէ Եպիսկոպոսաց Դասը, Զմմառու Պատրիարքական Կղերի Միաբանութիւնը և Տապպաղեան ընտանիքը, սրտի խոր կսկիծով կը գուժեն Զմմառու Պատրիարքական Կղերի Միաբանութեան անդամ եւ Պաղտատի վաստակաւոր Առաջնորդ՝ Արհի. Հ. Էմմանուէլ Արք. Տապպաղեանի վախճանումը, որ տեղի ունեցաւ Հինգշաբթի 13 Սեպտեմբեր 2018-ին, առաւօտուն, Ս. Խաչ քոյերու հանգստատան մէջ, յետ կարճատեւ հիւանդութեան:

Կենսագրութիւն

Հ. Էմմանուէլ ծնած է Հալէպ 24 Դեկտեմբեր 1933-ին: Եկեղեցական ասպարէզին նուիրուելու նպատակով, մուտք գործած է Զմմառու դպրեվանք և երկու տարի Գասլիքի համալսարանին մէջ Իմաստասիրութեան դասընթացքներուն հետեւելէ ետք՝ Հռոմի Լեւոնեան Քահանայապետական հայ վարժարան ուղարկուած է 4 Օգոստոս 1962-ին, որմէ ետք յաճախած է Յիսուսեան Հայրերու «Գրիգորեան» Քահանայապետական համալսարանը: Քահանայ ձեռնադրուած է 25 Դեկտեմբեր 1967-ին՝ ձեռամբ Վսեմ. Կարդ. Աղաճանեանի, Հռոմի Ս. Նիկողայոս եկեղեցւոյ մէջ: Վարդապետութեան առաքելութեան առաջին դաշտը եղած է Այնճարի Աղաճանեան որբանոցը: Ապա Զմմառու դպրեվանքի տեսուչ եղած է: Այնուհետեւ Պուրճ համուտի ժողովրդապետ:

Արեւելեան Եւրոպայի և յատկապէս Վրացահայոց առաքելութեան նուիրուած է, ծառայելով Չաւախքի և Թիֆլիսի կաթողիկէ հայոց:

2007-ին, Հայ Կաթողիկէ Սիւնհոդոսական Հայրերու կողմէ ընտրուած է Պաղտատի Հայ կաթողիկներու Առաջնորդ և 4 Օգոստոս 2007-ին եպիսկոպոս ձեռնադրուած է ձեռամբ երջանկայիշատակ Ներսէս Պետրոս ԺԹ. Կաթողիկոս Պատրիարքի Զմմառու մէջ:

Երկար տարիներ Պաղտատի Կաթողիկէ Հայոց Առաջնորդական պաշտօնը կատարելէ ետք, վերջին մի քանի տարիներուն Զմմառ վերադարձած էր:

Վախճանեալ Գերապայծառը իր կեանքի վերջին հանգրուանին՝ վատառողջութեան պատճառով փոխադրուած էր հանգստատուն: Չորեքշաբթի 12 Սեպտեմբեր 2018-ին՝ Գերապայծառ Հայրը Եկեղեցւոյ Սուրբ Խորհուրդներով զօրացած՝ ստացաւ Վերջին օծումը: Հինգշաբթի 13 Սեպտեմբեր 2018-ի վաղ առաւօտուն իր մահկանացուն կնքեց Ս. Խաչ քոյրերու հանգստատան մէջ:

Իր գրչին կը պատկանին կրօնաբարոյական յօդուածներ, «Յիսուս Կեանքի Հացը» գիրքը, ինչպէս նաեւ հոգեւոր երգերու նուիրուած գիրք մը:

Ուրբաթ 14 Սեպտեմբեր 2018-ին, Առաւօտեան ժամը 11:00-ին, նախագահութեամբ Ամենապատիւ և Գերերջանիկ Հոգեւոր Տիրոջ, Սուրբ և Անմահ Պատարագ պիտի մատոցուի, որուն պիտի յաջորդէ լուսահոգի Գերապայծառին յուղարկաւորութեան և թաղման կարգը Զմմառու վանքի Մայր Տաճարին մէջ: Այնուհետեւ հանգուցեալին մարմինը պիտի ամփոփուի միաբանական դամբարանին մէջ: Ցաւակցութիւնները պիտի ընդունուին յուղարկաւորութենէն անմիջապէս յետոյ եւ կ. ե. ժամը 4-էն 7 Զմմառու մայրավանքի դահլիճին մէջ. իսկ Շաբաթ 15 Սեպտեմբերի առաւօտեան ժամը 10:00-13:00, Հայ կաթողիկէ Պատրիարքարանին մէջ, Ժէիթաուի։
Աստուծմէ հայցելով երկնային խաղաղութիւն և հանգուցեալին յաւիտենական հանգիստ, մեր խորին ցաւակցութիւնները կը յայտնենք Միաբանութեանս աւագ և կրտսեր բոլոր անդամներուն, խնդրելով Տիրոջմէ նորանոր քահանայական կոչումներ ի փառս Աստուծոյ և ի պայծառութիւն Ս.Եկեղեցւոյ:

Խնկանուէր աղօթք և յաւիտենական հանգիստ լուսահոգի վարդապետին անմահ յիշատակին:

Զմմառ 13 Սեպտեմբեր 2018