• Անարատ Յղութեան տօնը՝ հայ միաբան քոյրերի Գիւմրիի տանը

    Անարատ Յղացեալ բարեխօսեա՛ վասն մեր


    Դեկտեմբերի 9-ը առանձնակի քաղցրութիւն եւ խորհուրդ ունի Անարատ Յղութեան հայ միանձնուհիների համար, որովհետեւ նրանց միաբանութիւնը նուիրուած է Աստուածամօր Անարատ Յղութեանը եւ արդէն 170 տարի վայելում է մաքրամաքուր Սուրբ Կոյսի հովանին եւ բարեխօսութիւնը: Անարատ Յղութեան տօնին, ըստ սովորութեան, միաբանութեան կենտրոններում մատուցւում է Սուրբ Պատարագ եւ կազմակերպւում են զանազան ձեռնարկներ:

     

    Գիւմրում այս տարի Սուրբ Պատարագը մատուցեց Գիւմրիի հայ կաթողիկէների ժողովրդապետ Գեր. Հ. Մաշտոց Վրդ. Զահթերեանը, համապատարագութեամբ Հ. Եղիա Վրդ. Դերձակեանի եւ Հ. Գեւորգ Վրդ. Սարգսեանի: Ներկայ էին Անարատ Յղութեան՝ Գիւմրում եւ Տաշիրում ծառայող հայ քոյրերը, Յիսուսի Կրտսեր քոյրերի միաբանութեան անդամ Քոյր Նոյէլ Լոքաթէլլին, Երեւանի Մխիթարեան ընծայարանի սաները, մօտ 90 երիտասարդ պարմանուհիներ՝ Աշոցքի եւ Տաշիրի հայ կաթողիկէ համայնքներից, որոնց հետ հայ քոյրերը աշխատում են համայնքներում՝ նրանց համար կազմակերպելով զանազան խմբակներ, զարգացողական դասընթացներ:

     

    Հ. Մաշտոցն իր քարոզում շնորհաւորեց քոյրերին՝ տօնի առթիւ՝ հայցելով Սուրբ Կոյսի բարեխօսութիւնը եւ աստուածային առատ շնորհներ՝ շարունակելու համար քրիստոսանուէր եւ ազգանուէր ծառայութիւնը Հայաստանի եւ սփիւռքի համայնքներում եւ մաղթելով, որ Աստծօ կամքով մօտ ապագայում միաբանութիւնն ունենայ նոր կոչումներ:

    Յընթացս Սուրբ Պատարագի քոյր Մարիամը կատարեց իր ուխտը՝ եւս մէկ տարով, իսկ միւս քոյրերը նորոգեցին իրենց մշտնջենական ուխտերն Աստծոյ առաջ:

     

    Սուրբ Պատարագից յետոյ Տիրամայր Հայաստանի Արուեստի դպրոցի ընդարձակ դահլիճում տեղի ունեցաւ միջոցառում՝ նուիրուած տօնին եւ գեղեցիկ հիւրասիրութիւն: Կենտրոնի սաները հանդէս եկան բանաստեղծութիւններով, ջերմ շնորհաւորանքներով՝ ուղղուած իրենց սիրելի քոյրերին, ում հետ անցել են բաւական երկար կեանքի ճանապարհ:

     

    Միաբանութեան ընդհանուր մեծաւորուհին՝ Քոյր Արուսեակ Սաճոնեանը, որ եւս ներկայ էր, պատմեց իր կոչման եւ միաբանութեանն անդամակցելու  պատմութիւնը.մի ճանապարհ, որի ընթացքում Աստծուն ծառայելու մասին որոշումը հեշտութեամբ չի առնուել, Աստծոյ հետ երկխօսութեան մի ուրոյն ճանապարհ, որն իր վերջո նուիրեալ եւ կազմակերպչական մեծ ձիրքերով օժտուած միանձնուհուն բերեց միաբանութեան ընդհանուր մեծաւորուհու պատասխանատու պաշտօնի ծառայութեանը: Քոյր Արուսեակի փափագն է, որ իր կեանքի օրինակով երիտասարդները մտածեն իրե՛նց կեանքի ճանապարհի մասին. ի՞նչ է պատրաստել Աստուած իւրաքանչիւրի համար:

     

     

    Համերգային գեղեցիկ ծրագրով հանդէս եկաւ Տիրամայր Հայաստանի երգչախումբը՝ մաէստրո Ռոբերտ Մլքէյեանի գեղարուեստական ղեկավարութեամբ:

Օրացույց

Օրացույց


Recent Comments