Բաժիններ՝ Նորություններ
  • Ազատանի հայ կաթողիկե համայնքն արդեն հոգևոր երգչախումբ ունի

    Ազատանի հայ կաթողիկե համայնքն արդեն հոգևոր երգչախումբ ունի


    Գյուղական համայնքների եկեղեցիներում հոգևոր երգչախումբ ունենալը բավական բարդ է Հայաստանի պայմաններում՝ հաշվի առնելով եկեղեցական համայնքների ոչ վաղ անցյալում վերաձևավորված լինելը, հոգևոր կյանքի վերազարթոնքի կարճ ժամանակահատվածը, հոգևորականների թվի պակասը, հոգևոր երգարվեստում որոշ հմտություններ ունեցող  անձանց թվի պակասը՝ էլ չխոսելով գյուղական  համայնքներում կայացած մասնագետների գրեթե բացակայության կամ Եկեղեցու ֆինանսական հնարավորությունների սղության մասին: Գոյություն ունեցող կաթողիկե գյուղական երգչախմբերից շատերը պատանի կամ երիտասարդ աղջիկներից են բաղկացած, ովքեր առանց ֆինանսական ակնկալիքների իրենց լավագույնն են տալիս երգարվեստի հմտություններ ձեռք բերելու և հոգևոր երգեր կատարել կարողանալու համար: Նման երգչախմբերի ձևավորումը բավական երկար ժամանակ ու մեծ ջանքեր է պահանջում:

     Ազատանի հայ կաթողիկե համայնքի Սբ. Աստվածածին եկեղեցին իր երգչախումբն ունեցավ միայն 2014թ. սկզբներին՝ համայնքի ժողովրդապետ Տ. Նարեկ քահանա Թադևոսյանի և համայնքի նվիրյալների ջանքերով: Երգչախումբը դեռատի աղջիկների մի փոքրիկ խումբ է, ովքեր արդեն մի քանի ամիս է՝ եկեղեցում պարապում են՝ հոգևոր երգեր սովորելու և Սբ. Պատարագների ժամանակ երգել կարողանալու համար և նրանց ջանքերը պսակվում են հաջողությամբ, ինչին ականատես էլ լինում համայնականներն ու հպարտանում իրենց աղջիկներով: Խմբավար Աննա Դարբինյանը Գյումրիի հայ կաթողիկե ժողովրդապետության երգչախմբի անդամ է, մասնագիտությամբ երաժիշտ, ինքն էլ գործնական հմտություններ զարգացրել է Գյումրիի երգչախմբում երգելիս և հիմա իր գիտելիքները ջանում է փոխանցել իրենից կրտսերներին, ովքեր նույն ճանապարհն են անցնելու և, գուցե, հետո իրենք էլ իրենց հերթին օգնեն այլ համայնքներում երգչախմբեր ստեղծելու հոգևորականների նախաձեռնություններին: 10614014_756810077718866_1856927492_nԵրգչախմբի աղջիկները սովորում են թե ինչ բան է հոգևոր երգարվեստը և սկսում են գնահատել հայ հոգևոր երաժշտության գանձերը.մեկը որոշել է երգչուհի դառնալ, մյուսն ասում է, որ հոգևոր երգ երգելով կարող ես Աստծուն մոտենալ, մի երրորդն էլ թվարկում է Սբ. Պատարագի իր ամենասիրելի երաժշտական հատվածները:

    Ազատանի երգչախումբն առայժմ միաձայն է, բայց ծրագրում են առաջիկայում, Աստծո օգնությամբ, տղաներ էլ ընդգրկել ու երգչախումբը երկձայն դարձնել: Երգչախմբի մասին առանձին տեսանյութ կարող եք դիտել Ձայն խաղաղության 17-րդ թողարկման մեջ՝ այստեղ:

Օրացույց

Օրացույց


Recent Comments