Ն. Ս. Ֆրանցիկոս Սրբազան Քահանայապետը հանգիստ գիշեր է ունեցել և այս առավոտյան մի քիչ հնագստանալուց հետո տեսակապով հետևել է Հռոմեական Կուրիայի Հոգևոր կրթությանը, որից հետո մտել է մատուռ՝ աղոթելու:

Երկուշաբթի առավոտյան, ըստ Սուրբ Աթոռի մամլո հաղորդագրության, Նորին Սրբության առողջական վիճակի մասին կանխատեսումներն այլևս զգուշավոր չեն, նաև ասված է, որ նրա վիճակը մնում է կայուն: Բուժման գործընթացում արձանագրվել են բարելավումներ, ինչպես փաստել են արյան ստուգումներն ու կլինիկական ուսումնասիրությունները:

«Սակայն, ի նկատի ունենալով Քահանայապետի առողջության կլինիկական պատկերը և ծանր վարակը, որը հայտնաբերվել էր հիվանդանոց տեղափոխվելիս, անհրաժեշտ է ևս որոշ ժամանակով շարունակել դեղորայքային բուժումը՝ հիվանդանոցային պայմաններում»,- ասված է բժշկական արձանագրության մեջ:

Երկուշաբթի Պապը նաև մի երկտող էր ուղարկել Արգենտինայի նավահանգստային Բահիա Բլանքա քաղաքում տեղի ունեցած մահաբեր ջրհեղեղի զոհերի ընտանիքներին և տուժածներին՝ արտահայտելով իր մտերմությունը և նրանց համար կատարվող իր աղոթքները:

Պապի առողջության համար հավատացյալները անդադար աղոթքներ են բարձրացնում թե՛ Հռոմի Ջեմելլի հիվանդանոցի մոտ, թե՛ Վատիկանի Պողոս Զ Պապի սրահում և թե՛ տարբեր կաթողիկէ համայնքներում:

Մենք էլ ենք միանում բազում հավատացյալների աղոթքներին և առողջություն հայցում Տիրամոր բարեխոսությամբ:

Թարգմ.՝ Տ. Հովսեփ Քհն. Գալստյան

Դիվան Առաջնորդության Կաթողիկէ Հայոց,

11 մարտի, 2025թ.