Ուրբաթ, 01 մայիս, 2020 թուական: Գիւմրու Սրբոց Նահատակաց Հայ Կաթողիկէ Առաջնորդանիստ Եկեղեցւոյ մէջ Սուրբ եւ Անմահ Պատարագ մատուցուեց ձեռամբ Գերյ. Հայր Գառնիկ Ծ. Վրդ. Յովսէփեանի, առընթերակայութեամբ Արժ. Տէր Նարեկ Քհնյ. Թադեւոսեանի եւ Արժ. Տէր Սահակ Քհնյ. Աղէկեանի: Այսպիսով, պաշտօնապէս մեկնարկեց Սուրբ Վարդարանի ջերմեռանդութեան ամիսը:

Գերյ. Հայր Գառնիկն իր խօսքում փոքր պատմական ակնարկ կատարեց՝ նշելով, որ դեռեւս 14-րդ դարում Կաթողիկէ Ընդհանրական Եկեղեցին մայիսը հռչակել է Աստուածամօր ջերմեռանդութեան ամիս: Երբ միասնաբար աղօթում ենք Սուրբ Վարդարանը, ապա՝ միասին ապրում ենք Յիսուս Քրիստոսի երկնային կեանքի բոլոր դրուագները՝ Սուրբ Ծնունդից մինչեւ Հրաշափառ Յարութիւն, ուստի, կարող ենք նաեւ ասել, որ Սուրբ Վարդարանը Աւետարանական այս պատմութեան իւրօրինակ ամփոփումն է: Աստուածամայրն իր բոլոր երեւումների մէջ խնդրել է հաւատաւոր ժողովրդին աղօթել Սուրբ Վարդարանը, որը մեզ՝ քրիստոնեաներիս համար զէնք է ընդդէմ ամէն տեսակ չարիքի եւ դժուարութեան: Այնուհետեւ Հայր Սուրբը խօսեց Նորին Սրբութիւն Ֆրանցիսկոս Սրբազան Քահանայապետի յատուկ նամակի մասին՝ ուղղուած համայն աշխարհի հաւատացեալներին: Նամակ, որում Սրբազան Քահանայապետը հրաւիրում է իւրաքանչիւրիս, մեր տան մէջ, առանձին կամ ընտանիքի անդամների հետ միասին, աղօթելու Սուրբ Վարդարանը, իսկ ջերմեռանդութեան աւարտին առաջարկում է Տիրամօրը նուիրուած եւս երկու աղօթք՝ վստահեցնելով, որ ինքը եւս, հոգեպէս միանալով բոլորիս, պէտք է աղօթի մեզանից իւրաքանչիւրի համար, յատկապէս՝ տառապողների:

«Մայիսը Սուրբ Կոյս Մարիամի ջերմեռանդութեանը նուիրուած ամիս է, ուստի, քայլե՛նք այս ճանապարհը Աստուածամօր հետ, արտայայտե՛նք մեր սէրն ու նուիրումը մեր Մօրը: Եկէ՛ք միաւորուենք, դառնանք մէկ հոգեւոր ընտանիք եւ բոլորիս մօր՝ Մարիամի սրտի աչքերով մեր հայեացքն ուղղենք դէպի Քրիստոս՝ հայցելով Նրա փրկարար միջամտութիւնը, որպէսզի աշխարհում տիրող այս համաճարակը վերջ գտնի, ապաքինուեն Քորոնա ժահրով տառապող բոլոր հիւանդները, խնդրե՛նք Տիրոջ պաշտպանութիւնը բոլոր բժիշկների, հիւանդապահների, առողջապահութեան մարզի աշխատողների, հանրային ծառայողների, բոլոր նրանց, ովքեր օր ու գիշեր պայքարում են այս «անտեսանելի թշնամու» դէմ, վտանգում սեփական կեանքը՝ յանուն հազարաւոր այլ կեանքերի փրկութեան, գործի են դնում հնարաւոր եւ անհնար միջոցները, որպէսզի մարդկանց վերադարձնեն ամենաթանկը՝ առողջութիւնը: Տիրամօր բարեխօսութիւնն ենք ակնկալում բոլոր նրանց համար, ովքեր, համաճարակային իրավիճակի սահմանափակումներով պայմանաւորուած, այս օրերին հեռու են իրենց սիրելիներից: Թող Տէրը անսասան պահի բոլորի հաւատքը, ամուր պահի նրանց ոգին: Աղօթե՛նք այս համաճարակի անանուն զոհերի հոգիների հանգստութեան համար: Մխիթարութիւն, ուժ եւ կորով բոլոր նրանց, ում հարազատների կեանքերը խլեց այս մահաբեր ախտը:

Ա՛րդ, աղաչում ենք, Սուրբ Աստուածամայր, բարեխօսիր առ Քո Որդի եւ Աստուած մեր, որպէսզի փրկի մեզ ամէն տեսակ փորձութիւնից. այժմ եւ միշտ եւ յաւիտեանս յաւիտենից: Ամէն»:

Գերյ. Հայր Գառնիկ Ծ. Վրդ. Յովսէփեան

Փանիկի Սուրբ Աստուածածին Հայ Կաթողիկէ Եկեղեցւոյ Ժողովրդապետ,

Հայաստանի Հայ Կաթողիկէ Երիտասարդաց միութեան նախագահ

02.05.2020