2026թ. հունիսի 29-ից հուլիսի 3-ը Երևանի Կաթողիկէ Հայոց Առաջնորդարանում Առաջնորդ Հոր նախաձեռնությամբ հոգևոր դասի համար կազմակերպվեց եկեղեցական կանոնագիտության դասընթաց` Առաջնորդության Դատական Փոխանորդ Գերհարգելի Հ. Ֆաբրիցիո Տուրրիցիանիի բանախոսությամբ: Դասընթացի ընթացքում ընդարձակ բացատրություններ տրվեցին հետևյալ թեմաների շուրջ.

Սուրբ Պսակի անվավերության դատական ճանաչման կանոնական գործընթացը (մաս առաջին)

1. Ընդհանուր հասկացություններ (կանոններ, ընդհանուր նորմեր և մասնավոր օրենքներ, վավերացված և չիրականացված ամուսնություն),
2. Ամուսնության անվավերության հիմնական պատճառները,
3. Եկեղեցական ատյանի իրավասությունը,
4. Եկեղեցական ատյանի կառուցվածքը,
ա. Դատական Փոխանորդ (Vicario Giudiziale) և դատավորներ
բ. Ամուսնական կապի պաշտպան, Արդարության Պաշտպան
գ. Նոտարներ և Դիվանապետ
5. Ամուսնության անվավերության հայտարարման գործընթացը
ա. Հայցադիմում (կառուցվածքը, հիմնական տարրերը, հեղինակը)
բ. Գրասենյակային տուրք (վճարման կարգը և ազատումը տուրքից)
գ. Հայցադիմումի ընդունման և կասկածի հաստատման դեկրետներ:

Կանոնական իրավունքը ժողովրդապետություններում
1. Ժողովրդապետական արխիվ (գրանցամատյաններ, հրապարակումներ և ծանուցումներ)
2. Տնտեսական կառավարում (ծխական և անձնական նվիրատվություններ)
3. Սուրբ Պատարագների մատուցումը (պատշաճություն, պատարագների քանակը, դիտավորություններ և նվիրատվություններ):

Սուրբ Պսակի անվավերության ճանաչման կանոնական գործընթաց (մաս երկրորդ)

1. Կողմերի և վկաների ծանուցումը և հարցաքննությունը
2. Փաստաթղթային ապացույցներ
3. Պաշտոնական փորձաքննություն (փորձագիտական եզրակացություն)
4. Դատավարության ավարտը
5. Փաստաբանի պաշտպանական ճառը (Restrictus) և Կապի պաշտպանի դիտարկումները
6. Դատավճռի ամսաթվի ծանուցումը և դատավճռի կայացումը
7. Դատավճռի եզրափակիչ մասը (նոր ամուսնության արգելք)
8. Գործադրության հրամանը և գրանցումը ծխական մատյաններում

Կանոնական իրավունքը ժողովրդապետություններում

1. Ամուսնության հայտարարությունների հրապարակում
2. Ամուսնություն տարբեր դավանանքների և տարբեր կրոնների միջև (արտոնում/dispensa)
3. Մկրտության կնքահայրերի թույլտվությունը (nulla osta)
4. Ժողովրդապետների այլ պարտականություններ:

Դասընթացի ավարտին նոր նշանակումներ կատարվեցին Առաջնորդության Եկեղեցական Ատյանի աշխատանքների առավել արդյունավետ կազմակերպման համար: Մեկ Դատավորի փոխարեն, այժմ Ատյանն ունի երեք դատավոր, Արդարության Պաշտպան և Ամուսնական կապի Պաշտպան:

Հուլիսի 2-ին տեղի ունեցավ Քահանայական ժողով, որի ընթացքում քննարկվեցին հովվական առաքելության հարցեր, որոնք առնչվում են Խորանի սպասավորների դասընթացների, պատանեկան ճամբարների, երիտասարդական ձեռնարկների կազմակերպմանը, ինչպես նաև մատակարարական հարցեր:

Տ. Հովսեփ Քհն. Գալստյան
Դիվան Առաջնորդության Կաթողիկէ Հայոց
2 հուլիսի, 2026թ.