Սիրելի եղբայրնե՜ր և քույրե՜ր,

Շուտով մայիս ամիսն է՝ այն ժամանակը, երբ Աստծո ժողովուրդն առավել խորը ջերմեռանդությամբ է արտահայտում իր սերն ու նվիրվածությունը Սուրբ Կույս Մարիամի նկատմամբ։ Ըստ ավանդույթի, ամբողջ մայիս ամսվա ընթացքում տանը և ընտանիքներում Վարդարան են աղոթում։ Խոսքը վերաբերում է տանը և ընտանիքին, որը մենք սկսեցինք արժևորել համաճարակի սահմանափակումների «շնորհիվ», այդ թվում նաև՝ հոգևոր տեսանկյունից։

Այդ պատճառով, ցանկանում եմ առաջարկել կրկին վերագտնել մայիս ամսվա ընթացքում տանը Վարդարան աղոթելու գեղեցկությունը։ Կարելի է աղոթել միասին կամ առանձին, ինքներդ որոշեցե՛ք՝ ըստ նպատակահարմարության: Սակայն ամեն դեպքում գոյություն ունի մի գաղտնիք, որն այդ աղոթքի պարզության մեջ է։ Վարդարան աղոթելու լավագույն սխեմաներ հեշտությամբ կարելի է գտնել, նաև՝ համացանցում։

Ցանկանում եմ ձեզ առաջարկել Սուրբ Աստվածածնին նվիրված երկու աղոթք, որոնք դուք կարող եք ասել Վարդարանի աղոթքի վերջում: Ես նույնպես աղոթելու եմ այդ աղոքները՝ հոգեպես ձեզ միացած։ Ես դրանք կցում եմ իմ նամակին, որպեսզի բոլորդ էլ ունենաք:

Սիրելի եղբայրնե՜ր և քույրե՜ր, Մարիամի՝ մեր Մոր սրտի հետ մեր սրտերը միացած՝ Հիսուս Քրիստոսի երեսի միասնական մտահայեցողությունը մեզ կդարձնի առավել միավորված հոգևոր ընտանիք և կօգնի հաղթահարել ներկայիս փորձությունները։ Ես կաղոթեմ ձեզ համար, հատկապես, նրանց համար, ովքեր բոլորից շատ են տառապում, սակայն ձեզ էլ խնդրում եմ, որ ինձ համար աղոթեք։ Ի սրտե շնորհակալություն եմ հայտնում և օրհնում եմ ձեզ։

Հռոմ, Սան-Ջովանի-ին-Լատերնո, 25 ապրիլի,  2020թ․։

Տոն՝ Սուրբ Մարկոս Ավետարանչի

Սուրբ Աստվածածնին նվիրված առաջին աղոթքը

Ո՜վ Մարիամ, Դու միշտ փայլում ես մեր ճանապարհին՝ որպես

Նշան փրկության և հույսի:

Քեզ ենք վստահում մեր կյանքը՝

Առողջությու՜ն հիվանդների,

որ Խաչի տակ կանգնած՝ միացար Հիսուսի տառապանքին, և հաստատուն պահեցիր Քո հավատքը։

Պաշտպա՜ն Հռոմի ժողովրդի,

Դու գիտես մեր բոլոր կարիքները, և մենք հավատում ենք, որ

Դու կապահովես, որ այս փորձությունից հետո մեզ վերադառնան ուրախությունն ու տոնախմբությունը, ինչպես Գալիլեայի Կանայում։

Մա՜յր Աստվածային Սիրո,

Օգնի՛ր մեզ ընդունել Հայր Աստծո կամքը և անել այն, ինչ ասում է մեզ Հիսուս,

Ով Իր վրա վերցրեց մեր տառապանքները և ծանրաբեռնվեց մեր ցավերով, որպեսզի Խաչի միջոցով մեզ առաջնորդի դեպի Հարության բերկրանքը։ Ամեն։

Ընդ հովանեաւ պաշտպանութեան քո ապաւինի՜մք, Սուրբ Աստուածածին, մի՛ անտես առներ զաղաչանս մեր ի կարիս մեր, այլ միշտ փրկեա՛ զմեզ յամենայն վտանգից մերոց, Կո՜յս փառաւորեալ եւ ամենօրհնեալ:

Սուրբ Աստվածածնին նվիրված երկրորդ աղոթքը

Քո պաշտպանությանն ենք ապավինում, Սուրբ Աստվածածի՜ն։

Ներկայիս փորձության մեջ, երբ ամբողջ աշխարհը կքած է տառապանքի ու տագնապի բեռան տակ,

Քեզ ենք ապավինում, Մա՜յր Աստծո և մեր Մայր, և ապաստան ենք խնդրում Քո հովանու ներքո։

Սուրբ Կույս Մարիա՜մ, դեպի մեզ դարձրու՜ քո գթասիրտ հայացքը՝ կորոնավիրուսի այս համաճարակի ընթացքում և մխիթարի՜ր նրանց, ովքեր շփոթված են և սգում են իրենց սիրելիների մահը, որոնց թաղման ձևը երբեմն վիրավորում է մարդու հոգին։

Քո մտերմությամբ քաջալերի՜ր նրանց, ովքեր անհանգստանում են իրենց հիվանդների համար, սակայն ում կողքին չեն կարող լինել, որպեսզի չտարածեն վարակը։

Հույս տու՜ր նրանց, ովքեր մտահոգ են անորոշ ապագայով՝  տնտեսության և աշխատանքի վրա դրա հետևանքներով հանդերձ:

Մա՜յր Աստծո և մեր Մա՜յր,

մեզ համար Հայր Աստծուց հայցի՜ր ողորմություն, հայցի՜ր այս ծանր փորձության ավարտը, որպեսզի մենք նորից տեսնենք հորիզոնը հույսի և խաղաղության։

Ինչպես Կանայում, այնպես էլ հիմա, Քո Աստվածային Որդուց խնդրի՜ր մխիթարություն՝ հիվանդների և զոհերի ընտանիքների համար, որպեսզի նրանց սրտերը բացվեն հույսի և վստահության առջև։

Պաշտպանի՜ր բժիշկներին, բուժքույրերին և բուժաշխատողներին, հիվանդապահներին և կամավորներին, ովքեր ճգնաժամի այս ծանր պայմաններում առաջնագծում են և վտանգում են իրենց կյանքը՝ այլ կյանքեր փրկելու համար։ Մասնակից եղի՜ր նրանց հերոսական գործին և նրանց պարգևի՜ր ուժ, գթառատություն և հարատև առողջություն։

Մոտ եղի՜ր նրանց, ովքեր զօրուգիշեր խնամում են հիվանդներին, մոտ եղի՜ր քահանաներին, ովքեր հովվական հոգատարությամբ և Ավետարանի հանդեպ հավատարմությամբ ջանում են օգնել ու աջակցել բոլորին։

Սուրբ Կույս Մարիա՜մ, լուսավորի՜ր գիտական աշխատողների մտքերը, որպեսզի նրանք գտնեն ճիշտ լուծումներ՝ այս վիրուսը հաղթահարելու համար:

Օգնի՛ր ազգերի առաջնորդներին՝ գործել իմաստուն, ողջամտորեն և առատաձեռնորեն, որպեսզի աջակցություն ցուցաբերեն բոլոր նրանց, ովքեր չունեն կյանքի անհրաժեշտ պայմաններ՝ մշակելով սոցիալական և տնտեսական ծրագրեր՝ հեռատեսության և համերաշխության ոգով։

Ամենասրբուհի՜ Մարիամ, արթնացրու՜ մեր մարդկային խիղճը, որպեսզի սպառազինության աճի և կատարելագործման համար նախատեսված հսկայական գումարներն ուղղվեն հետազոտությունների զարգացմանը, որոնք անհրաժեշտ են՝ հետագայում նման ողբերգությունները կանխելու համար։

Սիրելի Մա՜յր, ամբողջ աշխարհում մեծացրու՜ մեկ մեծ ընտանիքին պատկանելու գիտակցությունը, որպեսզի եղբայրական և համերաշխության ոգով շտապենք հաղթահարել մեծաթիվ կարիքներն ու աղքատությունը։

Զորացրու՜ մեզ հավատի մեջ, հարատև ծառայության և աղոթքի մեջ։

Մարիա՜մ՝ սգավորների մխիթարի՜չ, ողջագուրի՜ր քո տառապյալ զավակներին և խնդրի՜ր Աստծուն, որպեսզի Տերն Իր ամենակարող ձեռքով ազատի մեզ այս սարսափելի համաճարակից և, որ կյանքը հանդարտորեն վերականգնի իր բնականոն ընթացքը:

Ապավինում ենք Քե՜զ, որ միշտ փայլում ես մեր ճանապարհին՝ որպես Նշան փրկության և հույսի, ո՜վ բարեգութ, ո՜վ սիրատոչոր, ո՜վ սուրբ, ո՜վ քաղցր Կույս Մարիամ։ Ամեն։

Vatican News, русская служба,

Սուրբ Աթոռի պաշտոնական կայք,

Թարգմ.՝ Նաիրա Բաղդասարյան

              Տ. Հովսեփ Գալստյան