Տանն Կիլիկիո Կաթողիկէ Հայոց Կաթողիկոս Պատրիարք Ամենապատիվ և Գերերջանիկ Տ. Տ. Ռաֆայել Պետրոս ԻԱ-ի ընտրության առթիվ շնորհավորական այցեր են տեղի ունենում Հռոմի Լևոնյան հայկական վարժարանում։

Այս կապակցությամբ 2021թ․ հոկտեմբերի 5-ի առավոտյան Ասորի Կաթողիկէ Իգնատիոս Էֆրէմ Գ Յունան Պատրիարքը շնորհավորական եղբայրական այցելություն տվեց Ամենապատիվ և Գերերջանիկ Տ. Տ. Ռաֆայել Պետրոս ԻԱ Տանն Կիլիկիո Կաթողիկէ Հայոց Կաթողիկոս Պատրիարքին։ Յունան Պատրիարքի գլխավորած պատվիրակության կազմում էին եպիսկոպոսներ և վարդապետներ։

Հանդիպման ընթացքում Յունան Պատրիարքն իր եղբայրական շնորհավորանքները հղեց նորընտիր Պատրիարքին՝ սեպտեմբերին Հռոմում տեղի ունեցած արտահերթ ընտրական Սինհոդոսի ժամանակ պատրիարք ընտրվելու կապակցությամբ՝ նրան մաղթելով հաջողություն և հայրապետական հեզասահ գործունեություն, որպես կաթողիկէ քույր եկեղեցու հոգևոր հովիվ և գլուխ, լիբանանյան այս դժվարին և ճնշող պայմաններում։

Իր հերթին, Ամենապատիվ և Գերերջանիկ Տ. Ռաֆայել Պետրոս ԻԱ. Կաթողիկոս Պատրիարքը շնորհավորեց Ասորի Կաթողիկէ Հայրապետին իր քահանայական ոսկյա և եպիսկոպոսական արծաթյա հոբելյանների առթիվ՝ աղոթք բարձրացնելով առ Աստված, նրան առողջություն և երկար կյանք շնորհելու համար:

Երկու հոգևոր առաջնորդները իրենց ուրախությունն ու գոհունակությունը հայտնեցին միասնաբար աշխատելու եւ ծառայելու համար, ցուցաբերելով իրենց լիակատար պատրաստակամությունը հանուն եղբայրական համագործակցության՝ ի շահ երկու քույր եկեղեցիների բարօրության: Հանդիպման ընթացքում քննարկվեցին ներկայի հրատապ մարտահրավերները, հատկապես Լիբանանի և Միջին Արևելքի երկրների ընդհանուր իրավիճակը և այդ շրջաններում քրիստոնեական ներկայությունը:

Պատրիարքները քննարկեցին նաև եկեղեցական և հատկապես Տիեզերական Եկեղեցուն առնչվող հարցեր՝ մասնավորապես 2023թ․ Հռոմում տեղի ունենալիք Սինհոդոսը՝ նկատելով, որ Յունան Պատրիարքը Սինհոդոսի կազմակերպիչ մարմնում ներկայացնելու է Արևելյան Կաթողիկէ եկեղեցիները։

Երկու Պատրիարքների միջև գոյություն ունի հին բարեկամություն և եղբայրական սերտ հարաբերություններ, որոնք սկսվել են 20-րդ դարի 60-ական թթ.-ին Հռոմում՝ աստվածաբանության ուսումնառության ժամանակ։