26 մարտի, 2016թ.

 Ավագ Ուրբաթը Հիսուս Քրիստոսի չարչարանքների, խաչելության, մահվան ու թաղման հիշատակության օրն է: Տիրոջ չարչարանքների ծիսական հիշատակությունը սկսվում է  «Խավարման գիշեր» խորհրդավոր արարողությամբ, որը կատարվում է նախորդ օրը`Ավագ հինգշաբթի երեկոյան: Իսկ Ավագ Ուրբաթ օրը Կաթողիկէ եկեղեցիներում կատարվում է «Խաչի ճանապարհ» բարեպաշտական աղոթքը և խորհրդածությունը, որը մեր Տեր Հիսուս Քրիստոսի չարչարանքների վերապրումն է`տասնչորս հանգրվաններով կամ կայաններով.դրանցից յուրաքանչյուրը հիշեցնում է չարչարանքների ավետարանական մի դրվագ` դատավարություն և դատապարտում, խաչի ճանապարհի դժվարությունները, Տիրամոր հետ հանդիպումը, խաչելությունը, մահը խաչի վրա, գերեզմանում դրվելը:

«Խաչի ճանապարհից» հետո բոլոր կաթողիկէ եկեղեցիներում կատարվեց Երեկոյան ժամերգություն, որի ավարտին տեղի ունեցավ Հիսուսի թաղման արարողությունը` հանդիսավոր թափորով:

Գյումրիի Սրբոց Նահատակաց եկեղեցում Հիսուսի մարմինը պատկերող արձանը դրվեց ծաղիկներով զարդարված դագաղի մեջ, որը, հանդիսավոր և բազմամարդ թափորով, ժողովրդապետ Արժ. Տ. Գրիգոր ավ.քհն. Մկրտչյանի առաջնորդությամբ, սպասավորները դուրս բերեցին եկեղեցուց, «Ուր ես մայր իմ» հոգեպարար շարականի երգեցողությամբ, շրջեցին եկեղեցու բակում և դարձյալ մտցրեցին եկեղեցու գլխավոր մուտքի կամարներից ներս, աստիճանների վրա վեր բարձրացնելով, որպեսզի հավատացյալները անցնեն Տեր Հիսուս Քրիստոսի Մարմնի տակով: Այս սգո թափորը և դագաղի տակով անցնելը հրավիրում են խորհրդածելու Տիրոջ մահվան խորհրդի վսեմության մասին`որպես փրկության փարոս ու ապավեն:

Յավարտ թաղման արարողության, բոլորը միասին կատարեցին Սուրբ Խաչի երկրպագություն:

«Քում ամենազոր և հրաշալի թաղմանդ Քրիստոս Աստուած մեր` երկրպագեն զօրք հրեշտակաց. զի դու միայն ունիս զանմահութիւն  բնակեալդ ի լոյս անմատոյց: Եւ մեք հողեղէն արարածք խոնարհեալ երկիւղիւ երկիր պագանեմք.զսուրբ եւ զհրաշալի եւ զյաղթող զխաչելութիւնդ քո օրհնեմք եւ փառաւորեմք: Եւ ընդ երկնային զօրսն մատուցանեմք զօրհնութիւն եւ զփառս` ընդ Հօր եւ ընդ Սուրբ Հոգւոյդ, այժմ եւ միշտ եւ յաւիտեանս յաւիտենից. Ամէն»:

Արևիկ, 25 մարտի, 2016թ.

Փանիկ, 25 մարտի, 2016թ.

Տաշիր, 25 մարտի, 2016թ.

Հեշտիա, Ջավախք, 25 մարտի, 2016թ.