8 սեպտեմբերի, 2015թ.

Խորհրդաժողովին մասնակցել են Արևելյան Եվրոպայի  տարբեր երկրների եկեղեցական համայնքների ու հասարակական կառույցների ներկայացուցիչներ, Հայաստանից՝ Գյումրիի և Աշոցքի հայ կաթողիկէների ժողովրդապետ Գերպ. Հ. Պետրոս վրդ. Եսայանը և Փանիկի հոգևոր վարիչ Գերպ. Հ. Գառնիկ վրդ. Հովսեփյանը, «Հավատ և լույս» աղոթական համայնքի ղեկավար Անահիտ Մխոյանը: Հայ Առաքելական Եկեղեցին ներկայացրել է Գերշն. Տ. Մուշեղ եպս. Բաբայանը: Ելույթներ են ունեցել Դրեզդենի արքեպիսկոպոս դոկտոր Heiner Koch-ը, Կրակովի արքեպիսկոպոս կարդինալ Stanislaw Dziwisz-ը, Ֆրեյզինգի օժանդակ եպիսկոպոս Bernard Hablberger-ը, Կաունասի արքեպիսկոպոս Lionginas Virbalas-ը, ոլորտի աշխարհական մասնագետներ, Ռենովաբիսի ներկայացուցիչներ:

Ելույթներից զատ եղել են նաև խմբային քննարկումներ հետևյալ թեմաներով.

1.կրթության հասանելիություն բոլորի համար,

2.ինչպե՞ս կարելի է հասնել այս նպատակին,

3.մասնագիտություն և ընտանիք,

4.ինչպե՞ս կարելի է ակտիվացնել երիտասարդության ներգրավվածությունը քաղաքացիական հասարակության մեջ,

5.ի՞նչ կարող են անել երիտասարդները աշխարհում համաձայնություն և հաշտություն տարածելու ուղղությամբ, ինչպե՞ս կարելի է հավատքը և Եկեղեցին գրավիչ դարձնել երիտասարդների համար և այլն:

Մասնակիցները հնարավորություն են ունեցել նաև միասին աղոթելու և մասնակցելու Սբ. Պատարագների, որոնք մատուցվել են Ֆրեյզինգի տաճարներում:

Ռենովաբիսը Կաթողիկէ Եկեղեցու հովանու ներքո գործող կազմակերպություն է՝ հիմնված 1993թ., մայր գրասենյակը Գերմանիայում է: Ֆինանսական աջակցություն է ցուցաբերում Արևելյան Եվրոպայի տարբեր կաթողիկէ համայնքների՝ եկեղեցաշինության, հոգևոր դաստիարակության, պատանեկան ճամբարների կազմակերպման և այլ ոլորտներում, որտեղ եկեղեցիները նյութական խնդիրներ ունեն: Ռենովաբիսը մեծ օգնություն է ցուցաբերել և շարունակում է ցուցաբերել նաև Հայաստանի կաթողիկէ համայնքներին: Ռենովաբիսի տվյալներով, մինչ օրս 28 երկրներում աջակցել է 14.000-ից ավելի ծրագրերի իրականացմանը՝ կատարելով մոտ 400.000.000 դոլարի նվիրատվություն: