Հայաստանի, Վրաստանի, Ռուսաստանի եւ Արեւելեան Եւրոպայի Հայ Կաթողիկէների Առաջնորդ Արհ. Տ. Գէորգ Արքեպիսկոպոս Նորատունկեանը խորը վրդովմունք եւ մտահոգութիւն է յայտնել օրեր առաջ Հռոմի Պապական Գրիգորեան Համալսարանում տեղի ունեցած «Քրիստոնէութիւնը Ադրբեջանում. պատմութիւն եւ արդիականութիւն» խորագրով գիտաժողովի առնչութեամբ, որտեղ փորձ է արուել ուղղակի ժխտել Արցախում հայ հոգեւոր եւ պատմական ժառանգութեան հայկական պատկանելութիւնը եւ վիրավորել մեր հինաւուրց հայ քրիստոնեայ ժողովրդի արժանապատւութիւնը, այն էլ՝ քրիստոնեութեան համաշխարհային համբաւ վայելող ուսումնական մայր կաճառներից մեկում, որը պատկանում է Յիսուսեան Միաբանութեանը, եւ Հռոմում՝ քրիստոնեութեան հնագոյն բնօրաններից մեկում։ Կրկնակի՛ յանդգնութիւն եւ հայ ժողովրդի նկատմամբ ատելութեան արգահատելի հերթական ադրբեջանական դրսեւորումը:

Յիսուսեան Միաբանութեան Ընդհանուր Մեծաւոր Հայր Արտուրօ Սօզային ուղղուած իր նամակում Արհ. Տ. Գէորգ Արքեպիսկոպոս Նորատունկեանը դատապարտել է վտանգը, որ նման բարձրակարգ ակադեմիական հաստատութիւնները կարող են դառնալ պատմութեան կեղծման ամբիոններ, որտեղ զոհերի ձայները լռեցւում են կամ խեղաթիւրւում, իսկ հայ ժողովրդի տառապանքը անտեսւում է կամ շահագործւում։

«Իմ ժողովուրդը», գրել է Առաջնորդ Հայրը, «ենթարկուել է դաժան տեղահանութեան Արցախից եւ երկու հազարամեայ քրիստոնէական ներկայութեան համակարգուած ոչնչացման: Իւրաքանչիւր բառ, որ լռեցնում կամ խեղաթիւրելով շահարկում է այս իրականութիւնը, մի վիրաւորանք է, որ աղաղակում է Աստծոյ առաջ»:

Արքեպիսկոպոսը յիշեցրել է Ֆրանցիսկոս Պապի եւ Յիսուսեան Միաբանութեան հիմնադիր Սբ. Իգնատիոս Լոյոլացու խօսքերը՝ կրկնելով, որ չի կարելի խօսել երկխօսութեան մասին՝ թաքցնելով ճնշումները, ո՛չ էլ կրթել կշռադատութեան վերաբերեալ, եթէ հրաժարւում ենք ճշմարտութիւնից:

«Յիսուսեան Միաբանութիւնը ամբողջական սերունդներ է կրթել՝ նրանց մէջ սերմանելով ազատութեան եւ բարեխիղճ գիտակցութեան անքննարկելի սկզբունքները։ Այսօր, առաւել քան երբեւէ, Միաբանութիւնը կոչուած է լինելու յստակամիտ առաջնորդ, մարգարէական ձայն, այլ ո՛չ թե՝ լուռ հանդիսատես», գրել է Արքեպիսկոպոս Նորատունկեանը՝ Յիսուսեան Միաբանութեան մեծաւորին եւ խնդրել հեղինակաւոր այդ Միաբանութեանը վայել բծախնդրութեամբ եւ հոգեւոր եռանդով յետամուտ լինել՝ այդ եղելութեան պատճառներն առաւել խորութեամբ ուսումնասիրելու եւ իր նամակին արձագանքելու համար, որովհետեւ խնդիրը վերաբերում է ոչ միայն հայ ժողովրդի հոգեւոր եւ մշակութային ժառանգութիւնը վիրաւորելուն, այլեւ՝ Կաթողիկէ Եկեղեցու վաստակեալ եւ բազում սրբերի օրրան հանդիսացող Միաբանութեան հոգեւոր նկարագրի հանդէպ ոտնձգութեանը եւ բարի համբաւին:

Արքեպիսկոպոս Նորատունկեանը համոզում ունի, որ տեղի ունեցածը չէր կարող լինել Յիսուսեան Միաբանութեան, եւ առաւե՛լ եւս Հռոմի Սուրբ Աթոռի, դիտաւորութիւնը, եւ պատճառների մասին յստակ պատասխաններ ստանալուն պէս, Առաջնորդութեան քարտուղարութիւնը հանդէս կգա լրացուցիչ հաղորդագրութեամբ:

Քարտուղարութիւն Առաջնորդութեան Կաթողիկէ Հայոց