• Գերյ. Հայր Գառնիկ Ծ. Վրդ. Յովսէփեանի խօսքը՝ «Համայնքային Երիտասարդական Օրեր – VI» հանդիպման բացման արարողութեանը

    Այս միջոցառումը նոր տեսլական է խորապէս ճանաչելու սեփական ինքնութիւնը եւ պատկանելիութիւնը, պահպանելու համոզմունքները եւ աւանդոյթները:


    Յարգելի՛ հիւրեր, սիրելի՛ երիտասարդներ,

     

    Ինձ համար մեծ պատիւ է ողջունել ձեզ «Աղաճանեան» կենդրոնի այս հիւրընկալ յարկի տակ: Թոյլ տուէք շնորհակալութիւն յայտնել բոլորիդ՝ «Համայնքային Երիտասարդական Օրեր – VI» հանդիպմանը ներկայ գտնուելու համար:

     

    Ամենամեայ երիտասարդական այս հաւաքները հոգեւորի, մշակոյթայինի եւ ազգայինի միաձուլումն են: Կազմակերպչական ողջ անձնակազմը ջանք ու եռանդ չի խնայել, որպէսզի այս միջոցառումը դառնայ յիշարժան եւս մէկ իրադարձութիւն մեր բոլորի կեանքում:

     

    Ձեր ներկայութիւնը հաւաստիքն է այն բանի, որ աշխարհում տիրող հոգեւոր, մշակոյթային, սոցիալ-տնտեսական եւ քաղաքական բազմազանութեան մէջ՝ մենք կրողներն ենք միեւնոյն գաղափարախօսութեան, աւանդոյթների եւ հեգեւոր արժէքների:

     

    Այսպիսի միջոցառումների նպատակն է նոր գիտելիքների եւ փորձառութեան փոխանցումը մեր երիտասարդ սերնդին, որը թոյլ կը տայ ձեւաւորել առաւել հանդուրժող եւ գիտակից հասարակութիւն: Մեր նպատակն է բարձրացնել երիտասարդների դերը եւ ներգրաւուածութիւնը Եկեղեցու կեանքում եւ իրենց համայնքների հզօրացման գործում:

     

    Այս միջոցառումը նոր տեսլական է խորապէս ճանաչելու սեփական ինքնութիւնը եւ պատկանելիութիւնը, պահպանելու համոզմունքները եւ աւանդոյթները:

     

    Այս օրերին՝ հրաւիրեալ մասնագէտները եւ բանախօսները ձեզ բանախօսութիւններ կը ներկայացնեն հոգեւոր եւ հոգեբանական թեմաների շուրջ, որոնք կը նպաստեն ձեր գիտելիքների հարստացմանը եւ կոչման ընկալմանը: Սա հնարաւորութիւն է երկխօսութեան, համագործակցութեան եւ փոխըմբռնման, ինչը թոյլ կը տայ մարտահրաւէրներով լի եւ արագօրէն փոփոխուող այս աշխարհում դառնալ նոր առաջնորդներ, ովքեր պատրաստ են թարմ գաղափարներով եւ տեսլականներով նոր ուղիներ փնտռել՝ տնտեսական, քաղաքական եւ սոցիալական համակեցութեան համար: Այսպիսով, կը կարողանաք կերտել աւելի լաւ աշխարհ, որտեղ մարդիկ կ’ապրեն խաղաղ, ազատ եւ արժանապատիւ կեանքով:

     

    Այսօր, երիտասարդներից շատերը չեն կարող լիովին մասնակից լինել սոցիալական կեանքին, քանի որ ժամանակակից հասարակութեան մէջ նկատելիօրէն փոխուել են ինչպէս կենսապայմանները, այնպէս էլ ակնկալիքները եւ կարիքները: Հետեւաբար, այս փոփոխութիւններն ուղղակիօրէն ազդեցութիւն են ունենում երիտասարդների եւ հասարակութեան անդամների, ընտանիքների, նոյնիսկ Եկեղեցու հետ փոխյարաբերութիւնների վրայ: Ուստի, երիտասարդական այս հանդիպման նպատակներից մէկն է նաեւ ամրապնդել երիտասարդութիւն – Եկեղեցի – հասարակութիւն կապը: Եկեղեցին կարիքն ունի երիտասարդների, ովքեր ո՛չ միայն զօրաւոր հաւատք ունեն, այլեւ՝ իրենց գիտելիքներով, հմտութիւններով եւ աշխարհայեացքով կարող են վերջ դնել անհեթեթ այս պատերազմներին եւ հակամարտութիւններին: Այս ծանր ժամանակաշրջանում՝ միակ զէնքը, որ պէտք է գործադրեն երիտասարդները, դա դիւանագիտութիւնն է, որ կառուցելու է սպասուած խաղաղութիւնը եւ փոխարինելու է զէնքի ուժին՝ աջակցելով եւ նոր յոյս ներշնչելով տառապող ժողովուրդներին:

     

    Երիտասարդական հաւաքի այս օրերը նման են «հոգեւոր ուխտագնացութեան», որը մեզ կ’առաջնորդի դէպի կենդանի Քրիստոս: Ուստի, սիրելի՛ երիտասարդներ, պէտք է կարողանաք ձեր ապրած կեանքի իւրաքանչիւր օր վառ պահել ձեր հաւատքը եւ վկայել Քրիստոսին, պէտք է կարողանաք աղօթել ուրիշների համար եւ ձեռք մեկնել բոլոր նրանց, ովքեր կարիքն ունեն ձեր օգնութեան՝ համոզուած լինելով, որ ամէն անգամ, երբ օգնութեան ձեռք էք մեկնում՝ նոր էջ է բացւում Եկեղեցու, մեր համայնքների եւ ընտանիքների կեանքում: Մեզանից իւրաքանչիւրը, որքան էլ որ ուժեղ լինի՝ պէտք է գիտակցի, որ միայն միասնականութեան մէջ ենք դառնում անպարտելի:

     

    Այսպիսով, թոյլ տուէք պաշտօնապէս բացուած համարել «Համայնքային Երիտասարդական Օրեր-VI» հանդիպումը:

     

    Դիւան Հայաստանի Հայ Կաթողիկէ Առաջնորդութեան 

Օրացույց

Օրացույց


Recent Comments