Հայոց Ցեղասպանութեան 100-ամեայ տարելիցի կապակցութեամբ 2015թ. մարտի 14-ին յիշատակութեան միջոցառում է կազմակերպուել Վարշաւայում, Լեհահայերի մշակոյթի եւ ժառանգութեան հիմնադրամի նախագահ Ժան Աբգարովիչի նախաձեռնութեամբ: Միջոցառման գլխագիրն էր՝ «Հայեր 2015՝ մոխրից վերածնուող ազգ»: Սա մէկն էր այս տարուայ ընթացքում արդէն կազմակերպուած եւ դեռ տեղի ունենալիք միջոցառումների շարքի՝ Հայոց Ցեղասպանութեան արժեւորման եւ հայ նահատակների յիշատակութեան նպատակով: Միջոցառման մասին գրել է լեհական Gosc Niedzielny պարբերականն իր կայքում: Միջոցառմանը մասնակցելու հրաւիրուել էր նաեւ Գերշն. Տ. Ռաֆայէլ արքեպս Մինասեանը, լեհահայ կաթողիկէ համայնքի ժողովրդապետ Գերպ. Հ. Ռաֆայէլ վրդ. Կրավչիկը, եւ լեհահայ առաքելական համայնքի հովիւ Տ. Տաճատ աբեղա Ծատուրեանը, Լեհաստանում ՀՀ դեսպանը, լեհ եւ հայ հասարակական գործիչներ: Ելույթների ընթացքում անդրադարձ է եղել, որ Հայոց Ցեղասպանութիւնը առաջին ցեղասպանութիւնն էր 20-րդ դարում: Յիշուել է Հովհաննէս Պողոս Բ Սրբազան Քահանայապետի նկատառումը, թէ եթէ աշխարհը անտարբեր չլիներ հայերի ցեղասպանութեան նկատմամբ, հրէաների հոլոքոսթը տեղի չէր ունենայ: ՀՀ դեսպան Է. Ղազարեանը յայտնել է, որ լեհ Կոմպոզիտոր Քշիշտոֆ Պենդերեցկին, ով ծնուել է հայկական արմատներով ընտանիքում, Հայոց Ցեղասպանութեան 100-ամեայ տարելիցի առթիւ մի նոր ստեղծագործութիւն է գրել, որը կներկայացուի այս տարի Նիւ Յորքում: Միջոցառման ընթացքում եղել են մի քանի ելոյթներ եւ դասախօսութիւններ հետեւեալ թեմաներով. «Ռաֆայել Լեմկին. ցեղասպանություն տերմինի ստեղծող», բանախօս՝ պրոֆ. Անդժեյ Զիենբա, «Հայոց ցեղասպանությունը հիշատակող խաչքարներն աշխարհում» բանախօս՝ քհն. պրոֆ. Յուզեֆ Նաումովիչ: Բանախօսները փաստել են, որ Արեւմուտքը 1915-1916թթ. եղեռնական իրադարձութիւնների մասին հիմնականում գերադասում էր լուռ մնալ՝ բացառութեամբ մի քանի մտաւորականների՝ Անատոլ Ֆրանս, Ֆրիտեօֆ Նանսէն, Առնոլդ Թոյնբի եւ այլք:

 Միջոցառման ընթացքում Մազովիայի մարզպետ Յացեկ Կոզլովսկին Լեհաստանի կառաւարութեան անունից «Վաստակի Խաչ» շքանշանով է պարգեւատրել հայ կաթողիկէ համայնքի անդամ, գրող Մոնիկա Ագոպսովիչին, ով վերջերս մի գիրք է հրատարակել Լուովի հայ ժողովրդի պատմութեան վերաբերեալ: