Առաջնորդության Հովվական Խորհրդի (այսուհետ՝ Խորհուրդ) ստեղծման նպատակն է՝

առավել արդյունավետ իրականացնել Առաջնորդության ընդհանուր հովվական առաքելությունը՝ սինոդական ոգով՝ ապահովելով Առաջնորդության տարածքում հովվական առաքելության մեջ ներգրավված անձանց և հաստատությունների առավել լայն և գործնական խորհրդակցական մասնակցությունը՝ Առաջնորդության առաքելության համար առաջնային կարևորություն ունեցող հարցերի քննարկման և որոշումների ընդունման մակարդակներում:

Խորհրդի ստեղծումը համահունչ է Կաթողիկէ Եկեղեցու որդեգրած սինոդական ճանապարհի սկզբունքներին. սինոդականությունը Եկեղեցու միասնականության արտահայտությունն է, որտեղ բոլորը՝ եպիսկոպոսները, քահանաները, վանականները, միաձնուհիները, աշխարհականները միասին են կատարում Քրիստոսի կողմից ավանդված առաքելությունը՝ հռչակելու Ավետարանը, քայլելու Քրիստոսի և միմյանց հետ հաղորդության և սիրո մեջ, սրբության ճանապարհով՝ դեպի փրկություն:

Խորհուրդը ստեղծվում է՝ հիմք ընդունելով.

– Արևելյան Եկեղեցիների Կանոնագրքի 4-րդ հոդվածի՝ 272-275-րդ կանոնները,

– «Հայ Կաթողիկէ Եկեղեցի կրոնական կազմակերպության» կանոնադրությունը,

– հովվական հարցերի, խնդիրների լուծման, մարտահրավերների հաղթահարման ճանապարհին հավատացյալների փորձառական և մասնագիտական խորհրդատվությամբ առաջնորդվելու անհրաժեշտությունը,

– որոշումների ընդունման մակարդակում հնարավորինս բոլոր խմբերի և հաստատությունների ներկայացուցիչների մասնակցայնության, միասնականության և առավելագույն համերաշխության անհրաժեշտությունը,

– Առաջնորդության լայնածավալ տարածքի համայնքների, ընտանիքների, անհատների հոգևոր և բարոյական առավել միասնական նկարագիր զարգացնելու անհրաժեշտությունը:

Դրույթներ

1.Խորհուրդը, եպիսկոպոսի Առաջնորդությամբ և արտոնությամբ, պետք է ուսումնասիրի և իր եզրակացությունները հայտնի Առաջնորդության հովվական աշխատանքների, խնդիրների և մարտահրավերների վերաբերյալ: Տե՛ս՝ ԱԵԿ, Կանոն 272

2.Խորհուրդը զուտ խորհրդակցական մարմին է և որոշումներ չի կայացնում, այլ ներկայացնում է միայն եզրակացություններ, լուծումներ, ծրագրային առաջարկներ: Տե՛ս՝ ԱԵԿ, Կանոն 273, §1

3.Խորհուրդը պետք է բաղկացած լինի հոգևորականներից, վանական միաբանությունների անդամներից, և, հատկապես, աշխարհականներից՝ այնպես, որ Խորհրդում հնարավոր առավելագույն չափով ներկայացված լինեն Առաջնորդության մեջ գործող բոլոր հաստատությունները, հասարակությունները և խմբերը: Տե՛ս՝ ԱԵԿ, Կանոն 273, §1, 2

4.Խորհրդի անդամներ կարող են լինել միայն հավատքով, գովելի բարոյական նկարագրով և առաքինի անձինք: Տե՛ս՝ ԱԵԿ, Կանոն 273, §4

5.Խորհրդի նախագահը Առաջնորդ Վիճակավոր Արքեպիսկոպոսն է: Տե՛ս՝ ԱԵԿ, Կանոն 275

6.Երբ Առաջնորդական Աթոռը թափուր է, Խորհուրդը դադարում է գոյություն ունենալուց՝ մինչև նոր Առաջնորդի որոշումը: Տե՛ս՝ ԱԵԿ, Կանոն 274, §2

7.Միայն Առաջնորդ Արքեպիսկոպոսը կարող է գումարել Խորհրդի նիստեր՝ ըստ հովվական անհրաժեշտությունների, նախագահել նիստերին և հրապարակել նիստերի ընթացքում քննարկված նյութերը: Տե՛ս՝ ԱԵԿ, Կանոն 275

8.Խորհրդի հերթական նիստերը գումարվում են յուրաքանչյուր 6 ամիսը մեկ անգամ:

9.Խորհրդի արտահերթ նիստերը կարող են գումարվել ըստ Առաջնորդի որոշման:

Երևան, Հայ Կաթողիկէ Առաջնորդարան, 23 մայիսի, 2026թ.

Հաստատում եմ՝

✠ ԳԷՈՐԳ ՆՈՐԱՏՈՒՆԿԵԱՆ

Տիտղոսաւոր Արքեպիսկոպոս Սեբաստիոյ Հայոց

Առաջնորդ Հայաստանի, Վրաստանի, Ռուսաստանի

եւ Արեւելեան Եւրոպայի Կաթողիկէ Հայոց

Հովվական Խորհրդի կանոնադրությունը PDF