30 ապրիլի, 2015թ.

2015թ. ապրիլի 26-ին Մոսկվայի Անարատ Հղության Կաթողիկե Մայր տաճարում մատուցվեց Սբ. Պատարագ՝ նուիրուած Հայոց Ցեղասպանության 100-րդ տարելիցին, ձեռամբ Տանն  Կիլիկիո  Կաթողիկե  Հայոց Կաթողիկոս Պատրիարք Ամենապատիվ և Գերերջանիկ Տեր Ներսես Պետրոս ԺԹ-ի:  Սա Հոգեւոր Տիրոջ առաջին այցն էր Ռուսաստանի հայ կաթողիկէ համայնք եւ առաջին Սբ. Պատարագը ռուսաստանաբնակ հայ կաթողիկէների համար:

Սբ. Պատարագին ներկա էին Հայաստանի, Վրաստանի, Ռուսաստանի և Արևելյան Եվրոպայի Հայ Կաթողիկեների առաջնորդ Բարձշն. Տ. Ռաֆայել արքեպս. Մինասյանը, ում ուղեկցում էր թեմի առաջնորդական փոխանորդ Գերհ. Հ. Մեսրոպ թ.ծ.վրդ. Սիւլահեանը, Մոսկվայի և համայն Ռուսիո Պատրիարքի տեղեպահ  Բարձշ. Տ. Սավվա եպս. Վոսկրեսենսկին, Հայ Առաքելական Եկեղեցու Ռուսաստանի և Նոր Նախիջևանի թեմի առաջնորդ գերաշնորհ Տ. Եզրաս արքեպիսկոպոս Ներսիսյանը, Ռուսաստանում Կաթողիկե Եկեղեցու լատինածէս համայնքի առաջնորդ Բարձշն. Տ. Պաոլո արքեպս. Պեցին, Ռուսաստանում պապական նվիրակ Բարձշ. Տ. Իվան արքեպս. Յուրկովիչը, Հռոմի Լևոնյան վարժարանի ռեկտոր Գերհ. Հ. Գևորգ ծ.վրդ. Նորատունկյանը, Ռուսաստանի հայ կաթողիկէ համայնքների ժողովրդապետները (Մոսկվայի ժողովրդապետն է Գերհ. Հ. Պետրոս ծ.վրդ. Պետրոսյանը), Ռուսաստանի, ՀՀ պետական գերատեսչությունների ներկայացուցիչներ, հասարակական  և մշակույթի գործիչներ, հարյուրավոր հայ կաթողիկե հավատացյալներ:

Սբ. Պատարագի ավարտին հայ ժողովրդին ցավակցության և Ցեղասպանությունը դատապարտող խոսքերով հանդես եկան քույր եկեղեցիների ներկայացուցիչները:

Այնուհետև, տեղի ունեցան պարգևատրության և նվերների հանձնման արարողություններ:

Ցեղասպանության հարյուրամյա տարելիցին նվիրված միջոցառումների Համառուսական հանձնաժողովի կողմից Սևծովյան-Կասպյան տարածաշրջանի սոցիալական և քաղաքական հետազոտությունների ինստիտուտի տնօրեն Վլադիմիր Զախարովը «Ի հիշատակ Հայոց Ցեղասպանության հարյուրամյակի» հուշամեդալներ հանձնեց Ամեն. Տ. Տեր Ներսես Պետրոս ԺԹ-ին, Բարձշն. Տ. Ռաֆայել արքեպս. Մինասյանին,  պապական նվիրակ Բարձշն. Տ. Իվան արքեպս. Յուրկովիչին, Բարձշն. Տ. Պաոլո արքեպս. Պեցիին, Գերհ. Հ. Պետրոս ծ.վրդ. Պետրոսյանին, Մոսկվայի Հայ Կաթողիկե եկեղեցական խորհրդի պատվավոր անդամ, Ռուսաստանի Դիվանագետների ասոցիացիայի նախագահ Պողոս Ակոպովին և Հայ Կաթողիկե եկեղեցու բարերար Խաչատուր Աղաբաբյանին, ևս մեկ հուշամեդալ հանձնվեց՝ Նորին Սրբություն Ֆրանցիսկոս Պապին փոխանցելու համար:

Ռուսաստանաբնակ հայ տաղանդավոր նկարիչ-քանդակագործ Ֆրիդոն Ասլանյանը Սբ. Պատարագին ներկա բարձրաստիճան հոգևորականներին նվիրեց իր հեղինակած կտավները՝ Արևմտյան Հայաստանում գտնվող և թուրքական կողմից ոչնչացված կամ ոչնչացման եզրին գտնվող եկեղեցիների ու վանքերի պատկերներով և Երանելի Իգնատիոս Մալոյանի և Ամենապատիվ Հոգևոր Տիրոջ Ներսես Պետրոս պատրիարքի, Ամենայն Հայոց Կաթողիկոս Խրիմյան Հայրիկի, բարերար Խ.Աղաբաբյանի  դիմանկարներով: Իսկ Մոսկվայի հայ կաթողիկե համայնքին նվիրեց ապրիլի 12-ին Վատիկանում Սրբազան Ֆրանցիսկոս Պապի կողմից Տիեզերական Եկեղեցու վարդապետ հռչակված Սբ.Գրիգոր Նարեկացուն պատկերող մի կտավ:

 Ամենապատիվ Հոգևոր Տեր Ներսես Պետրոս պատրիարքն իր կողմից երախտագիտություն հայտնեց և հուշամեդալներով պարգևատրեց Ռուսաստանի Հայ Կաթողիկե եկեղեցու զարգացմանն աջակցող, նախաձեռնող հավատացյալներին` բարերարներ Խաչատուր Աղաբաբյանին, Ալեքսանդր Յադոյանին, Սիմոն Բախչինյանին, Մկրտիչ Օքրոյանին, Եկեղեցական Խորհրդի պատվավոր անդամ Ա. Ղազարյանին, գլխավոր խորհրդատու Պողոս Ակոպովին, խորհրդի  անդամներ Է. Էքմեքչյանին, Հ. Ամիրխանյանին, Հ. Արթինյանին, Երանելի Մալոյանի անվան եկեղեցական երգչախմբի խմբավար Մ. Բաղնիքյանին, խորհրդի քարտուղար և ծրագրերի կազմակերպիչ Վ. Ասատրյանին, Երիտասարդաց միության նախագահ Մ. Մովսեսյանին:

ՀՀ Պաշտպանության Նախարարության կողմից նվեր հանձնվեց Գերհ. Հ. Պետրոս ծ. վրդ. Պետրոսյանին:

Պատարագից հետո, հոգևորականները հանդիսավոր երթով, զանգերի հարյուր զարկերի ներքո ուղղվեցին դեպի եկեղեցու բակում տեղադրված  խաչքարը, որը տեղադրվել է Մեծ Եղեռնի 100-րդ տարելիցի կապակցությամբ` Ռուսաստանի հայ կաթողիկե եկեղեցու բարերար Խաչատուր Աղաբաբյանի հովանավորությամբ, և հեղինակությամբ գյումրեցի քանդակագոր Խաչատուր Դանիելյանի:

Ամենապատիվ և գերերջանիկ Հոգևոր Տերն օծեց խաչքարը: Օծման արարողությունն ավարտվեց եկեղեցական խորհրդի պատվավոր անդամ դոկտոր Գևորգ Մովսեսյանի ելույթով, ով ժողովրդապետ Գերհ. Հ. Պետրոս ծ.վրդ. Պետրոսյանի անունից իր երախտագիտությունը հայտնեց ՌԴ ղեկավարությանը՝ Հայ ժողովրդին պաշտպանելու, ապահով կեցության և գործունեություն ծավալելու հնարավորությունների տրամադրման համար:

  Ապա մոմավառություն եղավ, ծաղիկներ դրվեցին հուշարձանի առջև և աղոթք բարձրացվեց առ Աստված՝ անմեղ նահատակների համար:

Ապրիլի 26-ի հանդիսավոր արարողություններն ավարտվեցին ճաշկերույթով:

Նյութը պատրաստեց՝

 Վարդուհի Ասատրյանը:

Մոսկվա, 29 ապրիլի, 2015թ.