• Հոգեւոր կրթութիւն ընդառաջ Սուրբ Յարութեան տօնին

    «Դուք մի՛ վախեցէք, գիտեմ, որ փնտրում էք Յիսուսին, որ խաչուեց. այստեղ չէ նա, քանի որ յարութիւն առաւ» (Մատթ. 28, 5-6):


     

    2022 թուական, 6 ապրիլ, ԼԸ օր աղուհացից:

    Հայաստանի, Վրաստանի, Ռուսաստանի, Ուկրաինայի եւ Արեւելեան Եւրոպայի Հայ Կաթողիկէ Առաջնորդութիւնը՝ Գիւմրու Սրբոց Նահատակաց Հայ Կաթողիկէ Աթոռանիստ Եկեղեցում Տեառն մերոյ Յիսուսի Քրիստոսի Հրաշափառ Յարութեան տօնին ընդառաջ կազմակերպել էր մէկօրեայ հոգեւոր կրթութիւն՝ Հայաստանի Հայ Կաթողիկէ թեմի հոգեւորականի համար:

    Հոգեւոր կրթութիւնը մեկնարկեց Սուրբ եւ Անմահ Պատարագով, ձեռամբ Առաջնորդական տեղապահ՝ Գերյ. Հայր Գառնիկ Ծ. Վրդ. Յովսէփեանի, առընթերակայութեամբ Արժ. Տէր Մաշտոց քհն. Ղազարեանի եւ Արժ. Տէր Կոմիտաս քհն. Դաւէեանի:

    Սուրբ գրային ընթերցումներից յետոյ, գերյարգելի վարդապետը նախ եւ առաջ  հոգեւոր դասին փոխանցեց Ամենապատիւ եւ Գերերջանիկ Տէր Ռաֆայէլ Պետրոս ԻԱ. Կաթողիկոս-Պատրիարքի հայրական օրհնութիւնը, ապա ուրախութիւն յայտնեց, որ Յիսուսի Քրիստոսի Հրաշափառ Յարութեան տօնին ընդառաջ, Աստուծոյ կամքով եւ օրհնութեամբ նորից հնարաւորութիւն է ընձեռուել մէկտեղ հաւաքուել ի մի Քրիստոս:

     

    «Սիրելի՛ հոգեւորականներ մեզանից իւրաքանչիւրը եկեղեցու մէկ սիւնն է:  Մաղթում եմ, որ  Յարութեան նախատօնին բոլորս առաջնորդուենք Քրիստոսի Հրաշափառ Յարութեան լոյսով՝ յաղթահարելով մեզ տրուած փորձութիւնները եւ կեանքի մարտահրաւէրները ի սէր եկեղեցի եւ ի սէր քրիստոնեական վարդապետութեան: Եկէ՛ք մէկ անգամ եւս աղօթենք Բարձրեալին  նոր քահանայական կոչումների համար՝ հայցելով հունձքի Տիրոջից ասելով. «Հունձքը առատ է, բայց մշակները քիչ» (Ղուկ. 10:2):

    Գերյ. Հայր Գառնիկը հոգեւորականներին ներկայացրեց նաեւ առաջիկայ այն ծրագրերը, որոնք տեղի են ունենալու թեմում տարուայ ընթացքում:

    Սուրբ պատարագին յաջորդեց հոգեւոր կրթութիւնը: Գերպ. Հայր Եղիա Վրդ. Դերձակեանը բանախօսեց «Քրիստոսի հետ չարչարւում, խաչւում եւ մեռնում եմ՝ Նրա հետ յառնելու եւ ի յաւիտեան ապրելու համար» խօրագիրը կրող թեմայով:

     

    Ստորեւ մէջբերում ենք հատուած՝ գերապատիւ վարդապետի բանախօսութիւնից.

     

    «Սիրելի՛ հոգեշնորհ վարդապետներ եւ արժանապատիւ տէր հայրեր,

    … երախտապարտ եմ Տիրոջը, որ այսօր հնարաւորութիւն ունենք միասին աղօթելու եւ եւս մէկ անգամ Քրիստոսի Յարութեան խորհուրդը միմեանց հետ կիսելու:

    Յիսուս Քրիստոսի Յարութիւնը դարձաւ քրիստոնէական վարդապետութեան եւ հաւատի հիմքը. «Ինչո՞ւ ողջին մեռեալների մէջ էք փնտրում: Այստեղ չէ, այլ յարութիւն առաւ: (Ղուկ. 24:5-6):

    Յիսուս Քրիստոսը, որ  այս աշխարհում հզօրագոյնն է, գեղեցկագոյնն ու շքեղագոյնը, խեղճ ու տկար մարդու կերպարանք է ստանում: Փառաց Թագաւորը, թագաւորների Թագաւորը, Որդի՝ Դաւթի եւ Մարդու Որդին փառքի ու պատւի փոխարեն ծաղրանքի է արժանանում:

    Յիսուս շողշողած Թագը թողնում է՝ փշով պսակուելու համար, պայծառացած Գահից հեռանում է մի խաչափայտի վրայ խաչուելու համար:

    Անմահը, ում շնորհիւ նորից կեանք եղաւ, խաչի վրայ հոգին աւանդեց. Եւ ինչի՞ կամ ում ու՞մ համար: Պատասխանը մէկն է՝ մարդկութեան, ամբողջ մարդկանց՝  անխտիր, մեզ՝ բոլորիս համար.

    Մարդկային միտքը  ի զօրու չէ հասկանալու, թէ ինչպէս կարող էր Յիսուս Քրիստոս մարդկութեան մեղքերը իր վրայ վերցնելով բարձրանալ դէպի Գողգոթայ՝ խաչուել, թաղուել եւ ապայ՝ յարութիւն առնել:

    Մարդիկ երազում են հասնել փառքի, լինել յաջողակ, ունենալ անսահման հարստութիւն, իսկ Յիսուս Քրիստոսի ցանկութիւնն է մեզ բոլորիս ազատել մեղքերի ճիրաններից եւ արժանացնել երկնային արքայութեանը:

    Աստուծոյ կամքն ու ծրագիրները տարբեր են. մարդասէր, գթասիրտ ու ողորմած Աստուածը միշտ առիթ է տուել  մարդկանց ուղղուելու, շտկուելու ու վերանորոգելու իրենց հոգիները…

     

    Մարդիկ ասում են. «Երանի՜ նրանց, ովքեր երկրորդ, երրորդ կամ աւելի շատ հնարաւորութիւն են ունեցել քաղելու իրենց մեղքերը, բայց Աստուած մեզ ամէն օր ու ամէն վայրկեան նոր առիթ է տալիս շտկելու մեր սխալները: Մենք այս աշխարհում պանդուխտներ ենք. Եկէ՛ք ապրենք այնպէս, որ  ժառանգենք Աստուծոյ արքայութիւնում յաւիտեան ապրելու կարողութիւնը: Ամէն»:

     

    Բանախօսութիւնից յետոյ հոգեւորականները միասին աղօթեցին երեք ճաշու ժամերգութիւնը, որից յետոյ ամփոփեցին ժողովը:

    Գերյ. Հայր Գառնիկ Ծ. Վրդ. Յովսէփեան

    Առաջնորդական Տեղապահ Հայաստանի Հայ Կաթողիկէ Եկեղեցւոյ

     

Օրացույց

Օրացույց


Recent Comments