2016թ. Դեկտեմբերի 13-14-ը Երևանի Սբ. Գրիգոր Նարեկացի հայ կաթողիկէ ժողովրդապետության կենտրոնում տեղի ունեցավ երկօրյա հոգևոր կրթություն` Հայաստանում և Վրաստանում ծառայող հայ կաթողիկէ հոգևորականների և Արհ.Տ.Ռաֆայել արքեպս. Մինասյանի մասնակցությամբ։ Բանախոսում էր թեմի առաջնորդական փոխանորդ Գերհ. Հ. Մեսրոպ թ.ծ.վ. Սուլահյանը։

Հոգևոր խորհրդածությունները կենտրոնացան հետևյալ կետերի շուրջ.

Ինչ է քահանայական կոչումը,

Ինչու ենք յուրաքանչյուրս կոչված Տիրոջից`քահանայագործության,

Որն է քահանայագործության նպատակը,

Սրբություն և սրբության տանող ճանապարհը քահանայի կյանքում,

Աղոթքի իսկությունը, կյանքը վերածել աղոթքի`ի նմանություն Քրիստոսի,

Տեր Հիսուս Քրիստոսին հետևելը պահանջում է հերոսություն, հրաժարում սեփական աշխարհական կապվածություններից, ինչքերից, կարծրացած պատպատկերացումների` ճնշելով սեփական կամքը` հանուն աստվածային կամքի լիակատար իրագործման,

Հարկ է գտնվել մնայուն հրահանգման, հոգևոր կարգուկանոնի մեջ։

Երկրորդ օրը Հ. Մեսրոպ Սուլահյանը մի քանի առաջարկներ արեց` սուրբ խորհուրդների կատարման վերաբերյալ։ Կարևորվեց խորհրդակատարության միաձևության պահպանումը բոլոր համայնքներում։

Խոսվեց նաև հովվական ծառայության ներկա կոնկրետ մարտահրավերների, խնդիրների և ձեռքբերումների մասին։ Քահանաները հայտնեցին իրենց միասնական պատրաստակամությունը օգնելու թեմի առաջնորդին` լուծելու ընդհանուր խնդիրները։

Խորհրդածություններն ու զրույցները սկսվում էին միասնական Սբ. Պատարագով և ավարտվում երեկոյան ժամերգությամբ։

Տ. Հովսեփ քհն. Գալստյան