2025թ. հոկտեմբերի 24-26-ը Ղազանչի գյուղի ժողովրդապետական կենտրոնում կազմակերպվեցին ամենամյա հոգևոր կրթության օրերը՝ Մարիամի Լեգեոնի Հայաստանի կառույցների համար՝ «Սուրբ Հաղորդությունը և Մարիամը` որպես Տապանակ Աստծո» ընդհանուր խորհրդածության թեմայով: Հոգևոր կրթությանը մասնակցեցին լեգեոնականներ Մեծ Սեպասարի, Ղազանչիի, Երևանի և Սպիտակի ժողովրդապետություններից: Հոգևոր կրթությունը ամբողջությամբ կենտրոնացած էր Սուրբ Հաղորդության առանցքային կարևորության և Աստվածածնի հետ անբաժանելի աստվածաբանական կապի վրա:

Հոգևոր կրթության ամբողջ ընթացքը լի էր Սուրբ Հաղորդության երկրպագության և Վարդարանի հոգևորապես գերհարուստ, շատ գեղեցիկ աղոթքներով, լուռ աղոթական պահերով և բանախոսություններով, որոնք վարեցին Տ. Հովսեփ Քհն. Գալստյանը, Տ. Միքայել Քհն. Դոմբուրյանը և Եղբ. Արմեն Ադամյանը՝ հետևյալ ենթաթեմաների շուրջ.

– Սուրբ Հաղորդությունը` քրիստոնեական կյանքի առանցք,

– Սուրբ Հաղորդությունը և Աստվածամայրը,

– Ընդունել Սուրբ Հաղորդությունը Մարիամի ձեռքերով,

– Իմ առաքելությունը` որպես քրիստոնյա և որպես լեգեոնական:

Բանախոսություններին հաջորդում էին լուռ խորհրդածության պահեր և ընդհանուր քննարկումներ:

Բանախոսներն իրենց խոսքը և մեկնաբանությունները կառուցել էին բազմաթիվ հղումներ կատարելով Սուրբ Գրքին, Կաթողիկէ Եկեղեցու Քրիստոնեական Վարդապետությանը, եկեղեցական հայրերին և Մարիամի Լեգեոնի ձեռնարկին: Լեգեոնի առաքելության նպատակն է՝ Աստվածամորը ծառայելով Աստծո ժողովրդին ի մի հավաքել Ամենասուրբ Հաղորդության շուրջ, Քրիստոսի Սուրբ Զոհի սեղանի շուրջ, ուղեկցել մարդկանց դեպի Սրբություն և սրբացում, դեպի Քրիստոսանմանություն՝ Աստվածամոր օգնությամբ և առաջնորդությամբ:

Հոգևոր կրթության այս օրերը նաև միմյանց հետ ջերմորեն շփվելու գեղեցիկ առիթներ ընձեռեցին լեգեոնականներին:

Հավելենք նաև, որ շուտով Արհ. Տ. Գևորգ Արքեպս. Նորատունկյանի արտոնությամբ լույս կտեսնի նաև Մարիամի Լեգեոնի ձեռնարկի հայերեն փորձնական հրատարակությունը:

Դիվան Առաջնորդության Կաթողիկէ Հայոց

27 հոկտեմբերի, 2025թ.