«Զարմանալի են Աստծո գործերը. «Ամենազոր Աստված մեծամեծ գործեր արեց ինձ համար».Ղկ.,1:39: Սա Ֆրանցիսկոս Սրբազան Քահանայապետի՝ հիվանդների 25-րդ համաշխարհային օրվան նվիրված ուղերձի խորագիրն է: Հիվանդների համաշխարհային օրը կնշվի 2017թ. փետրվարի 11-ին՝ Տիրամայր Լուրդի տոնին:

Ներկայացնում ենք ուղերձի ամբողջական տեքստը՝ ստորագրված դեկտեմբերի 8-ին՝ Անարատ Հղության Տոնին:

«Սիրելի՛ եղբայրներ և քույրեր

Հաջորդ փետրվարի 11-ին, համայնական Եկեցեցին յուրահատուկ ձևով տոնելու է հիվանդների 25-րդ համաշխարհային օրը Տիրամայր Լուրդի եկեղեցում: Այս տարվա տոնի թեման  է «Զարմանալի են Աստծո գործերը. «Ամենազոր Աստված մեծամեծ գործեր արեց ինձ համար».Ղկ.,1:39: Տոնը հաստատվել է իմ նախորդի՝ Սբ. Հովհաննես Պողոս 2-րդի կողմից՝ 1992թ. և առաջին անգամ տոնվել Տիրամայր Լուրդի եկեղեցում՝ 1993թ.: Այս օրը մի հնարավորություն է՝ անդրադառնալու, հատկապես, հիվանդների կարիքներին և ընդհանրապես բոլոր նրանց կարիքերին, ովքեր տառապում են: Սա նաև մի առիթ է նրանց համար, ովքեր մեծահոգությամբ օգնում են հիվանդներին՝ սկսած  ընտանիքի անդամներից, առողջահապության աշխատակիցներից ու կամավորներից, որպեսզի շնորհակալություն հայտնեն Տիրոջն՝ իրենց տկար եղբայրներին ու քույրերին ընկերակցելու Աստվածատուր կոչման համար: Այս տոնակատարությունը նաև Եկեղեցուն տալիս է թարմացված հոգևոր էներգիա, որպեսզի այն ավելի լիարժեքոր իրականացնի  իր առաքելության հիմնարար մասը, որը ներառում է ծառայելը՝ աղքատներին, տկարներին, տառապյալներին, թշվառներին ու անտեսվածներին: Անշուշտ, աղոթքը, Հիվանդների օծման, Սբ. Պատարագի խորհրդակատարությունները և  բիոէթիկական ու աստվածաբանա-հովվական սեմինարը, որը անցկացվելու է Տիրամայր Լուրդի եկեղեցում այդ օրերին ստեղծելու է նոր և նշանակալի ավանդներ այդ ծառայության համար:

Նույնիսկ հիմա, ես հոգեպես ներկա եմ Massabielle քարանձավում, Անարատ Կույսի արձանի առջև, որտեղ Ամենակարող Տերը մեծ գործեր է կատարել մարդկության ազատագրման համար: Իմ մտերմությունն եմ հայտնում յուրաքանչյուրիդ՝ մեր տառապյալ եղբայրներին, քույրերին և ձեր ընտանիքներին, ինչպես նաև իմ երախտագիտությունն եմ հայտնում բոլոր նրանց, ովքեր տարբեր գործառույթներ ունեն ծառայության և ամբողջ աշխարհի առողջապահության կառույցների մեջ, ովքեր ձեր խնամքի, բուժման ու ամենօրյա բարեկեցության համար աշխատում են վարպետորեն, պատասխանատվությամբ և նվիրումով: Ես քաջալերում եմ բոլորիդ, հիվանդներին, տառապյալներին, բժիշկներին, բուժքույրերին, ընտանիքի անդամներին և կամավորներին ի դեմս Մարիամի, Ով տկարների Առողջությունն է, տեսնել յուրաքանչյուր մարդկային արարածի նկատմամբ Աստծո սիրո վստահելի նշանը և Նրա կամքին ընդառաջ գնալու մոդելը: Թո՛ղ, որ խոսքով ու խորհուրդներով սնուցված հավատքի մեջ միշտ գտնեք այն ուժը, որն անհրաժեշտ է Աստծուն սիրելու համար, և նույնիսկ հիվանդության փորձության ժամանակ:

Սբ. Բերնադետի նման մենք գտնվում ենք Մարիամի աչալուրջ հայացքի ներքո: Լուրդի խոնարհ օրիորդն ասում է մեզ, որ Կույսը, ում նա կոչեց «Սիրելի Տիկին», նայեց նրան այնպես, կարծես,  մի անձնավորություն նայում է մյուսին: Այդ պարզ խոսքերը նկարագրում են ամբողջական մի հարաբերություն: Բերնադետը՝ այդ աղքատ, անկիրթ ու հիվանդ աղջիկը զգաց, որ Մարիամն իրեն նայում է որպես անհատի: Սիրելի Տիկինը նրա հետ հարգանքով ու առանց վերամբարձ տոնի է խոսում: Սա հիշեցնում է մեզ, որ յուրաքանչյուր մարդ է և մնում է մարդկային էակ, ուստի հարկ է մարդուն վերաբերել հենց այդ նկատառումով: Հիվանդներն ու հաշմանդամները կյանքում ունեն իրենց սեփական անքակտելի արժանապատվությունն ու առաքելությունը: Նրանք երբեք չեն դառնում պարզապես առարկաներ: Եթե անգամ նրանք հանդես են գալիս պասիվությամբ, ապա իրականության մեջ երբեք այդպես չէ:

Դեպի Լուրդի անձավ կատարած իր այցելությունից հետո, իր աղոթքի շնորհիվ, Բերնադետն իր տկարությունը դարձրեց աջակցություն՝ այլոց համար: Իր սիրո շնորհիվ նա կարողացավ հարստացնել իր մերձավորներին և, նախևառաջ, իր կյանքն առաջարկեց՝ մարդկության փրկության համար:  Այն փաստը, որ Սիրելի Տիկինը խնդրեց նրան աղոթել մեղավորների համար, հիշեցնում է մեզ, որ տկարներն ու տառապյալները ոչ միայն ցանկանում են բուժվել, այլև ճշմարտապես քրիստոնեական կյանք ապրել՝ նույնիսկ նվիրվելով որպես Քրիստոսի ճշմարիտ առաքյալ աշակերտներ: Մարիամը Բերնադետին տվեց հիվանդներին ծառայելու կոչումը և խնդրեց նրան դառնալ գթության քույր, մի առաքելություն, որը նա կատարեց այնպիսի մի օրինակելի ձևով, որը մոդել դարձավ յուրաքանչյուր առողջապահական աշխատակցի համար: Եկե՛ք Անարատ Մարիամից խնդրենք հիվանդներին միշտ որպես անձնավորություններ ընդունելու պարգևը, ովքեր անշուշտ օգնության կարիք ունեն՝ երբեմն նույնիսկ ամենահասարակ բաներում, սակայն ովքեր իրենք էլ ունեն իրենց պարգևը, որպեսզի կիսեն այն մյուսների հետ:

Մարիամի հայացքը, որը սփոփանք է տառապյալներին, լուսավորում է Եկեղեցու դեմքը՝ տառապյալներին ու կարիքավորներին ծառայելու իր ամենօրյա հանձնառության ժամանակ: Տառապյալների և հիվանդների համար մխիթարության այս  թանկարժեք պտուղները պատճառ են՝ երախտագիտություն հայտնելու Տեր Հիսուս Քրիստոսին, Ով ըստ Աստծո կամքի, դարձավ մեզնից մեկը՝ կրելով նույնիսկ խաչելությունը՝ հանուն մարդկության փրկության: Քրիստոսի՝ Մարիամից ծնված Աստծո Որդու կողմից ցույց տրված համերաշխությունը մեզ հետ Աստծո ողորմած ամենազորության արտահայտությունն է, որ հայտնվում է մեր կյանքում, հատկապես, երբ կյանքն թույլ է, ցավով լի, նսեմացված, արհամարհված և տառանքի մեջ: Այդ համերաշխությունը կյանքը լցնում է հույսի զորությամբ, որը կարող է պահպանել մեզ և ունակ դարձնել նորից բարձրանալու:

Մարդկության ու հավատքի այս մեծ հարստությունը չպետք է շռայլվի: Ընդհակառակը, այն պետք է ոգեշնչի մեզ, որպեսզի մենք բացէ ի բաց խոսենք մեր մարդկային թուլությունների մասին և լուծենք ներկայիս առողջապահության և տեխնոլոգիայի  մարտահրավերները: Հիվանդների համաշխարհային Օրվան թո՛ղ որ մենք գտնենք նոր խթան, որպեսզի աշխատենք կյանքի, առողջության և շրջակա միջավայրի հանդեպ հարգանքի մշակույթի աճման համար: Թո՛ղ այս օրը նաև ոգեշնչում լինի նոր ջանքերի համար, որպեսզի պաշտպանենք անհատների ամբողջականությունը և արժանապատվությունը՝ բիոէթիկական հարցերի, խոցելի խմբերի և շրջակա միջավայրի պաշտանության նկատմամբ ճիշտ մոտեցման միջոցով:

Հիվանդների 25-րդ համաշխարհային օրվան ևս մեկ անգամ բժիշկներին, բուժքույրերին, կամավորներին և բոլոր այն նվիրյալ անձանց, ովքեր ծառայում են հիվանդներին ու կարիքավորներին,  առաջարկում եմ իմ աղոթական աջակցությունն ու քաջալերումը: Ողջունում եմ նաև եկեղեցական  ու հասարակական կառույցներին, որոնք աշխատում են այս նպատակով, և այն ընտանիքներին, ովքեր սիրով հոգ են տանում իրենց հիվանդների մասին: Աղոթում եմ, որ բոլորը լինեն  Աստծո սիրո ներկայության ուրախալի նշանները և ընդօրինակեն Աստծո բազմաթիվ բարեկամների լուսավոր կյանքի վկայությունը, հատկապես՝ Աստծո Սբ. Հովհաննեսի և Լելիսի Սբ. Կամիլիուսի՝ հիվանդանոցների ու առողջապահության աշխատակիցների սրբերի, և Մայր Թերեզա Կալկաթացու՝ Աստծո սիրո առաքյալի:

Սիրելի՛ եղբայրներ և քույրեր, հիվանդներ, առողջապահության աշխատակիցներ և կամավորներ, ես խնդրում եմ ինձ հետ միասին աղոթել Մարիամին: Թո՛ղ որ նրա մայրական բարեխոսությունը պահպանի և ուղեկցի մեր հավատքին և մեզ համար Իր  Որդուց ընդունի հույսը՝ բուժվելու և առողջության մեր ճամփորդության ընթացքում, ընդունի զգացումը՝ եղբայրության ու պատասխանատվության, նվիրում՝ մարդկության ամբողջական (integral) զարգացմանը և ուրախությունը՝ երախտագետ լինելու, ամեն անգամ, երբ Աստված զարմացնում է մեզ Իր հավատարմությամբ ու գթությամբ:

Մարիա՛մ, Մա՛յր մեր,

Ի մեջ Քրիստոսի, մեզ բոլորիս ընդունում ես որպես որդի կամ դուստր:

Պահպանի՛ր մեր սրտերում վստահ սպասումը,

սատարի՛ր մեզ՝ մեր տկարության ու տառապանքի մեջ,

և առաջնորդի՛ր մեզ դեպի Քրիստոս՝ քո Որդին և մեր եղբայրը:

Օգնի՛ր մեզ, որ ինքներս մեզ վստահենք Հայր Աստծուն,

Ով մեծամեծ գործեր է կատարում:

Իմ աղոթքներում մշտապես հիշելով ձեզ,

սրտանց բաշխում եմ բոլորիդ իմ Առաքելական Օրհնությունը»:

Թարգմանեց՝ Նարինե Գալոյանը