Հայ Կաթողիկե Եկեղեցու եպիսկոպոսաց Սինոդի խնդրանքով Տանն Կիլիկիոյ Կաթողիկէ Հայոց Ամենապատիվ Ներսես Պետրոս ԺԹ Կաթողիկոս Պատրիարքը նամակով խնդրել էր Ֆրանցիսկոս Սրբազան Քահանայապետին, որ Մեծ Եղեռնի 100-ամյա տարելիցի կապակցությամբ հայկական ծեսի ամբողջական շքեղությամբ Սուրբ Պատարագ մատուցվի Հռոմի Սուրբ Պետրոսի տաճարում՝ նախագահությամբ Սրբազան Քահանայապետի՝ ի ոգեկոչումն հիշատակի 1,5 մլն հայ զոհերի և արդարություն պահանջելով աշխարհի պետություններից և Ցեղասպանության ճանաչում՝ թուրքական կառավությունից: Սրբազան Քահանայապետը սիրով ընդառաջել է Հոգևոր Տիրոջ խնդրանքին.հայկական Սբ. Պատարագը Սուրբ Պետրոսի տաճարում կմատուցվի 2015թ. ապրիլի 12-ին: 2014թ. սեպտեմբերի 2-10-ը Զմմառի վանքում գումարված Հայ Կաթողիկե Եկեղեցու եպիսկոպոսաց Սինոդի տարեկան ժողովի ընթացքում եպիսկոպոսները գոհունակություն են հայտնել այդ կարևոր իրադարձության առթիվ և հատուկ հանձնախումբ կազմել հանրությանը իրազեկելու և ուխտավորների ուղևորությունը դեպի Հռոմ կազմակերպելու համար: Սինոդը կոչ է անում հայ ժողովրդին մեծ թվով մասնակցելու այդ պատմական և հույժ կարևոր արարողությանը, որին ներկա կլինեն բազմաթիվ բարձաստիճան հոգևորականներ տարբեր եկեղեցիներից, քաղաքական գործիչներ և աշխարհական հավատացյալներ: Ի դեպ, եպիսկոպոսաց Սինոդում խոսվել է նաև Ցեղասպանության հայ նահատակների՝ ընդհանրական Կաթողիկե Եկեղեցու կողմից երանացման ուղղությամբ տարվող աշխատանքների մասին, որոնք իրականացնում է այդ նպատակով ստեղծված հատուկ հանձնաժողովը: