Հայ Կաթողիկէ Եկեղեցին Տեառնընդառաջի կամ Քառասնօրյա Հիսուս մանկան ի տաճար ընծայման տոնը նշում է փետրվարի 2-ին, անխախտ կերպով՝ 40 օր հաշվելով Սբ. Ծննդյան տոնից, որ նշվում է դեկտեմբերի 25-ին: Ըստ ծիսակարգի, փետրվարի 1-ի երեկոյան կաթողիկէ եկեղեցիներում նախատոնակ է՝ ժամերգության հատուկ կարգով, որի ընթացքում երգվում է «Լոյս զուարթ» շարականը, ընթերցվում են հատվածներ Ղևտացվոց, Առակաց գրքերից, մարգարեություններից, Պողոս առաքյալի գաղատացիներին ուղղված թղթից (3:24-29) և Ղուկասի Ավետարանի 2:22-40 համարները, որտեղ պատմվում է Հիսուս մանկան ի տաճար ընծայման մասին: Ավետարանի ընթերցման ժամանակ, ըստ ավանդության, քահանան եկեղեցու բակում կամ այդ նպատակով հատկացված հատուկ այլ վայրում խարույկ է վառում, որը խորհրդանշում է Քրիստոսի փրկարար լույսը: Կրակը վառվում է Սիմեոն ծերունու գոհաբանական խոսքերի ընթացքում («լո՛յս ի յայտնութիւն հեթանոսաց եւ փառք ժողովրդեան քում Իսրայելի…»): Ժամարար քահանան արարողությունը վերջացնում է Տերունական աղոթքով և արձակում ժողովրդին, որից հետո նորապսակները, երիտասարդները, երեխաները սկսում են ուրախ միջոցառումը՝ կրակի վրա ցատկելով, երգուպարով, միմյանց քաղցրավենիք հյուրասիրելով: Իսկ փետրվարի 2-ին՝ մատուցվում է տոնական Սբ. Պատարագը: Հաճախ Սբ. Պատարագ է մատուցվում նաև նախատոնակին:

Հաշվի առնելով առատ ձյան և ձնաբքերի պատճառով ստեղծված անանցանելի կամ դժվարանցանելի վիճակը հյուսիսային շրջանների միջհամայնքային ճանապարհներին (որոշ գյուղական ճանապարհներ փակ են մնում օրեր շարունակ), հնարավոր չէր կազմակերպել նախատոնակի Ժամերգությունը կամ Տեառնըդառաջի տոնական Սբ. Պատարագը բոլոր գյուղական համայնքներում: Որոշ տեղերում տոնական արարողությունները հարկադրաբար տեղափոխվել են առաջիկա շաբաթ կամ կիրակի օրերին:

Ահա՛ մի քանի համայնքներից (Գյումրի, Փանիկ, Արփենի, Արևիկ) ստացված լուսանկարներ և տեսանկարահանումներ, որտեղ 2017թ. փետրվարի 1-2-ը տեղի ունեցան Տեառնընդառաջի տոնական արարողությունները:

Գյումրի, 1 փետրվարի, 2017թ.

Փանիկ, 2 փետրվարի, 2017թ.

Արևիկ, 2 փետրվարի, 2017թ.

Արփենի, 1 փետրվարի, 2017թ.

Հովտուն, 4 փետրվարի, 2017թ.

Ղազանչի, 5 փետրվարի, 2017թ.

Լուսանկարները կլրացվեն մյուս համայնքների լուսանկարներով