• Վերաօծվեց Խաշուտ-Աբաթխև գյուղի վերանորոգված եկեղեցին
    17991716_1877146605857727_356559654141446102_o

    Սուրբ Խաչ եկեղեցին նորոգել են խաշուտցիները:


    2017թ. ապրիլի 18-ին Արհ. Տ. Ռաֆայել արքեպս. Մինասյանը վերաօծեց Ջավախքի հայ կաթողիկէ Խաշուտ-Աբաթխև գյուղի վերանորոգված Սուրբ Խաչ եկեղեցին: Արարողությանը ներկա էին Վրաստանում քահանայապետական նվիրակ արքեպիսկոպոս Մարեկ Սոլչինսկին և նրա քարտուղարը, Վրաստանում ծառայող երկու լատին ծեսի վարդապետներ, Թբիլիսիի հայ կաթողիկէների ժողովրդապետ Հոգշն. Հ. Միքայել վրդ. Խաչկալյանը, Ծղալթբիլայի և Ջուլղաղի ժողովրդապետ Գերհ. Հ. Անատոլի ծ.վրդ. Իվանյուկը, Գյումրիի հայ կաթողիկէների ժողովդրապետ Արժ. Տ. Գրիգոր ավ.քհն. Մկրտչյանը, Խաշուտի ժողովրդապետ Արժ. Տ. Պողոս քհն. Գրիգորյանը, եկեղեցու վերանորոգման բարերարները, համայնքի բնակչությունը:

     

    17991306_1877146975857690_1368470034397438144_o

    Խաշուտի՝ դեռևս 1886թ. կառուցված Սուրբ Խաչ եկեղեցին վերջին մեկ տարվա ընթացքում հիմնովին նորոգվել է: Նորոգման աշխատանքները հիմնականում կատարվել են եկեղեցու ներսում՝ Սուրբ Խորանը, հատակը, պատերը, պատուհանները, վերնատունը: Խորանի վերևում ամրացված Խաչելության մեծ պատկերը նվիրել է Արհ. Տ. Ռաֆայել արքեպս. Մինասյանը: Վերանորոգման աշխատանքներն ամբողջությամբ ֆինանսավորել, կազմակերպել ու նախագծել են ծնունդով խաշուտցի մոսկվայաբնակ գործարարներ պրն. Ալեքսանդր Յադոյանը, պրն. Հովհաննես Յադոյանը և ճարտարապետ պրն. Հակոբ Արթենյանը: Նստարանները նվիրել է պրն. Մարտին Սիմոնյանը: Աշխատանքները կատարել են գյուղի բնակիչները: Կառուցապատվել և բարեկարգվել են նաև եկեղեցու բակը և հարակից ճանապարհը:

     

    Սեփական ուժերով եկեղեցի կառուցելը, նորոգելը հին ավանդություն է Խաշուտում: Նրանց պապերը ևս, ովքեր ներկա գյուղի տարածքում հաստատվել են 1830-ականներին՝ գաղթելով Արևմտյան Հայաստանի Էրզրումի վիլայեթի նույնանուն գյուղից, իրենց ձեռքերով, Մարգարի որդին Գրիգոր քահանայի առաջնորդությամբ կառուցել են իրենց եկեղեցին՝ 1881-1886թթ. և անվանել Սուրբ Խաչ: Գրիգոր քահանան (ըստ գյուղացիների, եղել է վարդապետ, ուսանել է Մխիթարյան Միաբանության ընծայարանում) թաղված է եկեղեցու բակում:

     

     

    Խաշուտ-Աբաթխև գյուղը գտնվում է Սամցխե-Ջավախքի Ախալցխայի մունիցիպալիտետում, Ախալցխա քաղաքից 14 կմ հարավ-արևմուտք։ Բնակիչները զբաղվում են հացահատիկի, կարտոֆիլի, բանջարեղենի մշակությամբ, անասնապահությամբ։

     

     

    17917121_1877146792524375_4374009580371505648_o 17973846_1877147379190983_7296116389889371515_o

    17990297_1877146799191041_6112572802389388986_o 17973702_1877146619191059_1093586342168823663_o

Օրացույց

Օրացույց