16 մայիսի, 2016թ.

 2016թ. մայիսի 14-ին Աշոցքի տարածաշրջանի «Տիրամայր Նարեկի»  հիվանդանացում    տեղի ունեցավ երիտասարդական հոգևոր դասընթաց` նախաձեռնությամբ` Աշոցքի տարածաշրջանի հոգևոր հովիվ Գերպ Հայր Ռաֆայել Կրավչիկի: Հոգևոր հանդիպմանը մասնակցում էին Բավրա, Սիզավետ, Հովտուն, Մեծ Սեպասար, Արփենի և Աշոցք գյուղերի շուրջ 2 տասնյակ  երիտասարդներ: Նպատակը ոչ միայն կայանալիք ԵՀՕ-2016 պատրաստությունն էր, այլ նաև համայնքներում երիտասարդական միությունների հոգևոր գործունեությանը առչվող թեմաների քննարկումը:

Հանդիպման սկզբում  Գերպ. Հայր Ռաֆայել Կրավչիկի ձեռամբ մատուցվեց Սուրբ Պատարագ: Քարոզի ընթացքում Հայր Ռաֆայել Կրավչիկը երիտասարդների հետ  խոսեց Եկեղեցում նրանց կարևոր դերի մասին.

«Սիրելի երիտասարդներ, ես այսօր շատ ուրախ եմ, քանի որ մենք այսօր կարող ենք հավաքվել, մի քիչ զրուցել ու միմյանց հետ ծանոթանալ: Սիրելի երիտասարդներ,  կարծում եմ, որ դուք գիտեք, որ երիտասարդական միտքն ու մտածելակերպը ուրիշ է` նույնիսկ երիտասարդի երազանքն է տարբեր:  Եկեղեցին կարիքն ունի երիտասարդների նորանոր մտքերին ու գաղափաներին:

Ես ուզում եմ, որ մենք Հայ Կաթողիկէ Եկեղեցու մեջ միասին աշխատենք: Միայն վարդապետը, քահանան չէ, որ պետք է աշխատի, այլ դուք, երիտասարդներ, դուք էլ պետք է աշխատեք մեզ հետ  միասին՝ Եկեղեցու համար, որպես երիտասարդ առաքյալներ: Սա քրիստոնեական մեծ ու արժեքավոր առաքելություն է: Առանց Եկեղեցու ոչ մի բան չկա:

Ձեր երիտասարդությունը պետք է մեր Եկեղեցու համար: Մեր այս ժողովի նպատակն է համախմբել ձեզ Եկեղեցու շուրջ: Շուտով Հայաստան պետք է գա Սրբազան Քահանայապետը: Սրբազան  Քահանայապետը մեր Եկեղեցու գլուխն է: Ի՞նչ նվեր ենք մենք ստանում, որ պիտի գա ու հասնի Գյումրի: Դուք կտեսնեք նրան ոչ միայն մեկ անգամ, այլ երկու անգամ: Սկզբից նա կգա մեզ մոտ, ապա մենք կգնանք իր մոտ: Եվ սա մեզ համար իսկապես մեծ առիթ է ուրախանալու համար: Առանց Եկեղեցու ոչ մի բան չկա»:

Սուրբ  Պատարագից հետո  Հայր Ռաֆայելի առաջարկով համայնքների ներկայացուցիչների միջև տեղի ունեցավ ծանոթություն: Երիտասարդները մեծ ուրախությամբ  պատմեցին  իրենց առօրյայի, նպատակների ու ակնկալիքների մասին, ընդգծելով, որ այսպիսի հոգևոր հանդիպումները իրենց տալիս են հոգևոր մեծ սնունդ և դարձնում էլ ավելի միասնական:

Ապա վրդ. Հայր Ռաֆայել Կրավչիկը  երիտասարդների համար կարդաց հատված` Պողոս առաքյալի նամակներից՝  ուղղված երիտասարդությանը:

Երիտասարդները միասին դիտեցին ֆիլմ, որը հոգևոր մեծ իմաստ և ուղերձ էր պարունակում:

Լիլիթ Մկրտչյան