7 մարտի, 2016թ.

Նորին Սրբություն Ֆրանցիսկոս Սրբազան Քահանայապետը Գյումրիի Սրբոց Նահատակաց առաջնորդանիստ հայ կաթողիկէ տաճարին նվիրել է խորհրդանշական մի քար՝ վերցված Հռոմի Սբ. Պետրոսի Մայր Տաճարի պատից՝ ի նշան միության և հաղորդության: Սրբազան Պապի անունից ուղարկել է Վատիկանի Սբ. Պետրոսի Պապական աթոռանիստ տաճարի լուսարարապետ Կարդինալ Անջելո Քոմաստրին՝ հատուկ նամակի հետ միասին:

2015թ. դեկտեմբերի 8-ով թվագրված այդ նամակում Կարդինալ Քոմաստրին գրում է, որ Պապի նվիրած քարը զետեղված էր Սբ. Պետրոսի տաճարի Սբ. Դռան մեջ 2000թ.՝ ձեռամբ Նորին Սրբություն Սբ. Հովհաննես Պողոս Բ Պապի: Քարը Սբ. Պետրոսի տաճարից վերցվեց Ողորմության հոբելյանական տարվա բացման առթիվ՝ 2015թ. դեկտեմբերի 8-ին Անարատ Հղության տոնին:

Գրված է նաև, որ այս քարը նվիրվում է «որպես նշան սերտ հաղորդության Սրբազան Քահանայապետի հետ, որը հաջորդն է Պետրոս առաքյալի և որպես մասնակցություն հոգևոր շնորհների հոբելյանական տարվա»:

Կարդինալն այնուհետև գրում է.

«Լիահույս ենք, որ Ողորմության Սուրբ Տարվա ընթացքում ձեր սրտերը խաղաղությամբ կլցվեն, ինչը աստվածատուր մի շնորհ է, որպեսզի կարողանաք սերմանել բոլոր այն մարդկանց սրտերում, ովքեր հանդիպելու են ձեզ»:

Խորհրդանշական քարը կզետեղվի Գյումրիի Սրբոց Նահատակաց եկեղեցու պատին:

Կարդինալ Քոմաստրիի նամակը

Գյումրիի Սրբոց Նահատակաց հայ կաթողիկէ առաջնորդանիստ եկեղեցի

Սուրբ Պետրոսի Մայր Տաճարը Հռոմում