24 սեպտեմբերի, 2015թ.

2015թ. սեպտեմբերի 23-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Սուրբ Էջմիածնում ընդունեց Տանն Կիլիկիո Կաթողիկէ Հայոց Ամենապատիվ Տ. Գրիգոր Պետրոս Ի Կաթողիկոս Պատրիարքին` ուղեկցությամբ Հայաստանի, Վրաստանի, Ռուսաստանի և Արևելյան Եվրոպայի հայ կաթողիկէների առաջնորդ Արհ. Տ. Ռաֆայել արքեպիսկոպոս Մինասյանի: Նորընտիր Պատրիարքն առաջին անգամ այցելեց Սբ. Էջմիածին:

     Հանդիպմանն Ամենայն Հայոց Կաթողիկոսն իր շնորհավորանքը բերեց Գրիգոր-Պետրոս Ի Կաթողիկոս Պատրիարքին՝ ընտրության ու գահակալության առիթով` մաղթելով նրան արգասավոր ծառայություն:

     Իր խոսքում Նորին Սրբությունը գնահատանքով ընգծեց, որ վերջին տարիներին Հայաստանյայց Առաքելական և Կաթողիկէ Եկեղեցու միջև հարաբերությունները վերելք են ապրում և հատկանշված են սերտ համագործակցությամբ:

     Այս կապակցությամբ Ամենայն Հայոց Հայրապետը գոհունակությամբ հիշեց Հայոց Ցեղասպանության 100-րդ տարելիցի առիթով Հռոմի Ֆրանցիկոս Սրբազան Քահանայապետի կողմից ապրիլի 12-ին Վատիկանի Ս. Պետրոսի տաճարում մատուցված սրբազան Պատարագի արարողությունը և Պապի կողմից հնչեցված ուղերձը` միտված մարդկության կյանքում նորանոր ոճիրների և ցեղասպանությունների կանխարգելմանը: Նորին Սրբությունը հաստատեց, որ համաշխարհային զարգացումների արդի պայմաններում Եկեղեցիներն արդարության ճանապարհ կարող են հարթել միմիայն համատեղ ջանքերով, փոխադարձ աջակցությամբ և աղոթքով:

     Իր հերթին Ամեն. Տ. Գրիգոր Պետրոս Ի Կաթողիկոս Պատրիարքը շնորհակալություն հայտնեց Ամենայն Հայոց Կաթողիկոսին իր ընտրության առիթով հղված շնորհավորական ուղերձի և մաղթանքների համար: Զրույցի ընթացքում Գրիգոր-Պետրոս Ի Պատրիարքը նշեց, որ պիտի ջանա ուժերի ներածին չափով իր հոգևոր փորձառությունը ծառայեցնել ի շահ իր հոտի, ինչպես նաև զորացնել հարաբերությունները Հայաստանյայց Առաքելական Ս. Եկեղեցու հետ:

Հանդիպմանը ներկա էին Մայր Աթոռ Սուրբ Էջմիածնի Արտաքին հարաբերությունների և արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը, Մայր Աթոռի լուսարարապետ Գերաշնորհ Տ. Հովնան եպիսկոպոս Հակոբյանը և Մայր Աթոռի Միջեկեղեցական հարաբերությունների բաժնի տնօրեն Հոգեշնորհ Տ. Շահե վարդապետ Անանյանը: