• Աշոցքի երիտասարդները ուխտագնացություն կատարեցին դեպի Մայր Թերեզայի քույրերի տուն

    «Խոնարհ Սիրտ Հիսուսի, լցրու՛ իմ սիրտը,
    Մաքուր Սիրտ Հիսուսի, մաքրի՛ր իմ սիրտը,
    Սիրակեզ Սիրտ Հիսուսի, լցրու՛ իմ սիրտը,
    Հիսուս, ահա՛ ես, սիրի՛ր ինձ». Սրբուհի Մայր Թերեզա


    2021-ի հունիսի 5-ին Տեր Հիսուս Քրիստոսի Ամենասուրբ Սրտին նվիրված մի հոգեշահ ուխտագնացություն կատարեցինք Աշոցքի հայ կաթողիկէ հինգ համայնքների 34 երիտասարդների հետ միասին: Ուխտագնացության վայրը Մայր Թերեզային Գթության միսիոներների՝ Սպիտակի տունն էր, որտեղ քույրերի հետ միասին ապրում են հատուկ կարիքներով մոտ երեք տասնյակ երեխաներ և չափահասներ: Քույրերի տան մատուռում միասին մատուցեցինք Սուրբ Պատարագ՝ մեզ հյուրընկալող տան քույրերի և հատուկ կարիքներով անձանց դիտավորությամբ: Պատարագի ընթացքում Աշոցքի երիտասարդներին պատմեցի Սրբուհի Մայր Թերեզայի կյանքի և նրա հիմնած Գթության քույրերի միաբանության պատմությունը: Պատարագի ավարտին կատարեցինք Հիսուսի Սուրբ Սրտին նվիրման ջերմեռանդական աղոթքը և երգեցինք Լիթանիան: Երիտասարդներն օրհնություն ստացան Սրբուհի Մայր Թերեզայի մասունքով, խնդրեցինք Սրբուհու բարեխոսությունը՝ մեր երիտասարդների համար:

     

    Աղոթքներից հետո մի գեղեցիկ հանդիպում կազմակերպեցինք քույրերի տան սաների հետ: Մեր երիտասարդները մուլտերի հերոսների կերպարներով ուրախացրեցին երեխաներին, երգեցին և պարեցին նրանց հետ միասին: Հաշմանդամություն ունեցող երեխաներն ու երիտասարդները ևս երգեցին, բարեմաղթանքներ ասացին, աղոթեցինք միասին և հրաժեշտ տվեցինք քույրերին ու սաներին՝ նորից նրանց այցելելու դիտավորությամբ:

     

    20-րդ դարում սկիզբ առած քրիստոնեական բարեսիրության ամենաակնառու օրինակներից մեկը Մայր Թերեզայի հիմնած Գթության միսիոներների միաբանության գործունեությունն է: Այն սկսվեց 1950թ. Հնդկաստանի Կալկաթա քաղաքից ու կարճ ժամանակում տարածվեց ամբողջ աշխարհում: Միաբանությունն այսօր ունի մոտ 5167 քույր, ովքեր բարեգործական տարբեր ծրագրեր են իրականացնում 133 երկրներում: Միաբանության առաքելությունը, ինչպես իրենք են ձևակերպել, «ամբողջ սրտով և ձրիաբար ծառայելն է ամենաաղքատներին»: Նրանք խնամում են հասարակության լուսանցքներում հայտնված, լքված, արհամարհված անդամներին` հիվանդներին, հաշմանդամություն ունեցող անձանց, անտուններին, ալկոհոլամոլներին, ծնողազուրկ երեխաներին, տարեցներին և այլն: Գթության քույրերը ցույց են տալիս մերձավորին անձնվեր ծառայության, նրա հանդեպ սիրո գեղեցիկ նմուշներ, որոնց առաջին օրինակը նրանց համար եղավ Մայր Թերեզան:

     

    Մայր Թերեզայի և Գթության միսիոներների մասին առավել մանրամասն պատմելու համար շուտով կպատրաստեմ մի գրքույկ:

     

    Տ. Հովսեփ Քհն. Գալստյան

     

Օրացույց

Օրացույց